Mali i Zi ka kërkuar hetim parlamentar për lidhjet midis mediave vendase dhe kompanive serbe M-tel, Alta Bank dhe Alta Pay Group, nën dyshimet se këto marrëdhënie mund të jenë përdorur për ndikim politik nga Beogradi. Lëvizja Evropa Tani (PES), partia e kryeministrit Milojko Spajiç, ka paraqitur kërkesën për të verifikuar marrëdhëniet financiare, pronësore dhe tregtare mes televizioneve kombëtare dhe këtyre kompanive, si dhe nëse ato janë përdorur për të ndikuar në raportimin televiziv, opinionin publik dhe zhvillimet politike në vend.
Spajiç ka shprehur dyshime për ndërhyrje të mundshme të huaja, duke thënë se zhvillimet e fundit konfirmojnë seriozitetin dhe cilësinë e informacioneve që disponojnë shërbimet malazeze dhe partnerët e sigurisë. Në një postim në rrjetin social X, ai kërkoi nga institucionet të zbulojnë se kush ka mbrojtur interesat e Malit të Zi dhe kush, sipas tij, është mbështetur te qendrat e pushtetit në vende të tjera dhe ka përdorur mjete të paligjshme për të kërcënuar stabilitetin dhe për të penguar integrimin europian.
Në kërkesën e PES theksohet se M-tel operon në Mal të Zi që prej vitit 2007 dhe ofron shërbime telefoni, interneti dhe televizioni; kompania është pjesë e Telekom Srbija, ku shteti serb zotëron 58.11% të aksioneve. Grupi Alta lidhet me biznesmenin serb Davor Macura, të cilit më 14 tetor iu ndalua hyrja në Mal të Zi në aeroportin e Podgoricës. Më 30 tetor, Banka Kombëtare e Serbisë i hoqi licencën Alta Bank për shkak të përkeqësimit të gjendjes financiare dhe rrezikut për likuiditetin; administrimi i bankës iu kalua Agjencisë së Sigurimit të Depozitave. Banka Qendrore e Malit të Zi sqaroi se Alta Bank nuk ka licencë për aktivitet bankar në Mal të Zi dhe se vendimi në Serbi nuk paraqet rrezik për sistemin bankar malazez.
Në Podgoricë operon Alta Pay Group, e licencuar që nga janari 2024 për shërbime pagesash dhe transferta parash; autoritetet po verifikojnë nëse kompania përmbush kërkesat ligjore. Dyshimet e Spajiçit datojnë që më 27 gusht, kur paralajmëroi për një operacion të mundshëm të koordinuar kundër Malit të Zi, që sipas tij mund të përfshinte zyrtarë nga të paktën dy vende të rajonit dhe aktorë politikë e mediatikë brenda vendit. Në atë kohë gazeta Vijesti raportoi, me burime anonime, se mund të ishte përfshirë edhe Shqipëria; kjo pretendim shkaktoi reagime në Tiranë dhe kryeministri Edi Rama kërkoi sqarime, ndërsa iu komunikua se Shqipëria nuk ishte ndër vendet për të cilat kishte folur Spajiç.