Sot e hënë, në Kuvendin e Kosovës do të mbajnë mbledhje pesë komisione parlamentare.
Në orën 11:30 do të mblidhet Komisioni Hetimor Parlamentar për veprimet dhe mosveprimet institucionale lidhur me vrasjen e Arlinda Zekës dhe trajtimin e dhunës ndaj fëmijëve dhe grave në familje.
Në këtë mbledhje parashihet konstituimi i komisionit dhe hartimi i planit të veprimit.
Ndërsa, komisioni për Integrim Evropian do të takohet në orën 09:00 me kryenegociatorin e Kosovës me Bashkimin Evropian dhe koordinatorin kombëtar për Planin e Rritjes, Jeton Zulfaj.
Në të njëjtën orë, Komisioni për Arsim dhe Shkencë do të organizojë një tryezë diskutimi lidhur me sfidat dhe prioritetet në arsimin parauniversitar në Kosovë.
Në orën 13:00 do të mbahet mbledhja e Komisionit Ad Hoc për përzgjedhjen e kandidatëve për anëtarë të Bordit të RTK-së, ku do të shqyrtohet lista e kandidatëve të propozuar.
Ndërsa, në orën 14:30, Komisioni për Punë të Jashtme dhe Diasporë do të zhvillojë takim me ambasadorin e Gjermanisë në Kosovë, Rainer Rudolph.