Në aeroportin Capodichino të Napolit, një i ri rreth 30 vjeç ka kaluar më shumë se një muaj pa dokumente, para apo sende personale. Ai thotë se është nga Suedia, por nuk kujton emrin e tij, si ka mbërritur në Itali apo ndonjë hollësi tjetër për jetën e vet.
I përshkruar si i rregullt në paraqitje dhe shumë i sjellshëm, ai qëndron në aeroport pothuajse gjatë gjithë kohës që ai është i hapur, nga ora 03:30 e mëngjesit deri në 22:30. Natën përpiqet të gjejë strehë në zonat përreth, ndërsa aeroporti është bërë i vetmi vend ku mund të qëndrojë.
Të lidhura
None found
Historia e tij sjell ndër mend personazhin e Tom Hanks në filmin “The Terminal”, një burrë që mbetet i bllokuar në aeroport. Sipas gazetës italiane “La Repubblica”, i riu është bërë tashmë pjesë e përditshmërisë në Capodichino. Punonjësit e dyqaneve dhe bizneseve aty janë afruar me të: disa i japin ushqim, të tjerë rroba të pastra, ndërsa të tjerë i kanë siguruar produkte të higjienës personale.
Mbyllja e aeroportit të Napolit më 1 nëntor, për punime mirëmbajtjeje në pistë, e ka vështirësuar më tej gjendjen e tij. Aeroporti nuk pritet të rihapet për rreth 30 ditë, duke lënë të paqartë se ku do të qëndrojë i riu gjatë kësaj kohe.
Me të është takuar edhe Pierluigi Petrone, konsulli i nderit i Suedisë në Napoli. Ai i tha “La Repubblica” se kishin biseduar shkurt në anglisht dhe se i riu i kishte treguar vetëm që ishte suedez e nuk mbante mend asgjë për identitetin e tij. Sipas Petrone, ai është i edukuar dhe nuk ka shkaktuar shqetësime, por mbetet e panjohur si mbërriti aty dhe përse vazhdon të qëndrojë në aeroport.
Për të zbuluar identitetin e tij është përfshirë edhe Policia Kufitare, e cila i ka dërguar një komunikim ambasadës suedeze në Romë. Në dokumentin zyrtar, ai cilësohet si një “shtetas i dyshuar suedez” që ndodhet prej disa ditësh në aeroportin e Napolit.
Petrone u ka bërë thirrje qytetarëve që, nëse e njohin të riun nga fotografitë, të ndihmojnë për identifikimin e tij. Synimi është që ai të mund të kontaktojë familjarët dhe, nëse është e mundur, të kthehet pranë tyre. Deri tani, identiteti i tij, mënyra si përfundoi në Napoli dhe vendndodhja e shtëpisë së tij mbeten të panjohura.
