Protesta studentore kundër qeverisë së Edi Ramës vijon edhe sot, duke shënuar ditën e 21-të të qëndresës. Të rinjtë nuk kanë ndryshuar qëndrim dhe këmbëngulin se largimi i kryeministrit është kushti për t’i dhënë fund revoltës.
Me moton “Pa dorëheqje nuk ndalojmë”, studentët kanë njoftuar se do të mblidhen në orën 12:00 pranë Universitetit Politeknik të Tiranës, për të vijuar protestën e nisur prej javësh.
Përgjatë këtyre ditëve, të rinjtë kanë refuzuar të tërhiqen nga kërkesa e tyre politike, pavarësisht përpjekjeve për të zbehur qëndresën. Ata kërkojnë dorëheqjen e Edi Ramës, duke e bërë të qartë se nuk e konsiderojnë të përfunduar protestën pa plotësimin e këtij kushti.
Në ditën e 21-të, mesazhi i studentëve mbetet i njëjtë: nuk ka tërheqje dhe as ndalim të protestës pa largimin e kryeministrit.
