Prishtina do të jetë sërish sot vendi i protestës për drejtësi për Arlinda Zekajn dhe kundër vrasjes së grave. Tubimi, i paralajmëruar si protestë kombëtare kundër femicidit, vjen pas pesë ditësh radhazi protestash.
Kolektivi për Mendim dhe Veprim Feminist ka bërë të ditur se protesta do të nisë në orën 17:00, në sheshin “Zahir Pajaziti”, dhe u ka bërë thirrje qytetarëve t’i bashkohen.
Të lidhura
None found
Gjatë pesë ditëve të mëparshme, qytetarët kanë dalë në rrugë për të kërkuar drejtësi për Arlinda Zekajn, si edhe përgjegjësi nga institucionet për vrasjen e saj.
Arlinda Zekaj u vra më 25 tetor në Vitomiricë të Pejës. Ngjarja ka shkaktuar reagime të shumta, sidomos pas raportimeve se ajo u ishte drejtuar më herët institucioneve për mbrojtje për shkak të dhunës dhe kërcënimeve.
Rasti ka vënë sërish në qendër të vëmendjes sigurinë e grave, mënyrën si trajtohet dhuna në familje dhe detyrimin e institucioneve për të parandaluar femicidin.
Me protestën e sotme, organizatorët kërkojnë të mbajnë gjallë mobilizimin qytetar kundër dhunës ndaj grave dhe kërkesën për drejtësi për viktimat.
