Kanë dalë pamjet nga ngjarja e regjistruar mëngjesin e kësaj të hëne në zonën e Komunës së Parisit në Tiranë, ku dyshohet se nën kërcënimin e armës u grabit “Raiffeisen Bank”.
Sipas informacioneve paraprake, një person i maskuar ka hyrë në ambientet e bankës dhe, nën kërcënimin e armës, ka marrë një shumë parash. Pas grabitjes, autori është larguar në drejtim të paditur.
Siç shihet dhe në pamjet e mëposhtme, pas incidentit forca policie kanë rrethuar zonën, ndërsa nuk dihet ende nësa ka persona të lënduar nga grabitja.
Po ashtu, nuk ka informacion zyrtar për shumën e parave të grabitur.
“Rreth orës 10:45, në zonën e Komunës së Parisit, një shtetas i maskuar ka hyrë në ambientet e një banke të nivelit të dytë dhe, nën kërcënimin e një sendi në dukje armë, dyshohet se ka marrë një shumë parash. Pas marrjes së njoftimit, janë ngritur pika kontrolli dhe janë orientuar të gjitha shërbimet policore, me qëllim identifikimin dhe kapjen e autorit”,- njoftoi sot policia.
Grupi hetimor po punon për identifikimin e autorit dhe dokumentimin e plotë të rastit.
