Qeveria e Kosovës e ka përmbyllur me nisjen e nëntorit fushatën e “Tetorit Rozë”, muajit kushtuar ndërgjegjësimit për kancerin e gjirit. Në tryezën “Përtej Tetorit Rozë”, vëmendja u përqendrua te vazhdimi i kontrolleve edhe pas përfundimit të fushatës.
Kryeministri Albin Kurti u shpreh se shpreson që shoqëria kosovare të bëhet më e vetëdijshme për rëndësinë e kontrolleve shëndetësore. Sipas tij, synimi është të nxitet kujdesi i vazhdueshëm për shëndetin dhe që askush të mos e shtyjë kontrollin. Ai tha se institucionet duhet të zvogëlojnë kohën dhe pengesat ndërmjet shqetësimit dhe kontrollit, diagnozës dhe trajtimit, si edhe ndërmjet gruas që kërkon ndihmë dhe institucionit që i përgjigjet.
Të lidhura
None found
Kurti përmendi fushatat e Ministrisë së Shëndetësisë dhe Institutit Kombëtar të Shëndetësisë Publike, krahas angazhimit të organizatave dhe ndërmarrjeve publike e private. Ai bëri të ditur se mamografia ofrohet falas gjatë gjithë vitit, ndërsa në tetor mamografi mobil shkon nëpër qytetet e Kosovës për t’ua afruar këtë shërbim grave. Sipas tij, për pacientet që trajtohen në Onkologji janë përmirësuar kushtet dhe janë vendosur aparatura të teknologjisë së fundit. Falas dhe pa pritje ofrohet edhe rikonstruktimi i gjirit.
Ministri i Shëndetësisë, Arben Vitia, tha se më shumë se 50 për qind e rasteve të kancerit të gjirit janë zbuluar në faza të hershme dhe se synimi është rritja e mëtejshme e kësaj përqindjeje. Ai sqaroi se plani i veprimit për screening-un e kancerit të gjirit ka nisur të zbatohet. Vitin e kaluar, 53.4 për qind e grave me këtë sëmundje u diagnostikuan në stadin e parë dhe të dytë; bazuar në informacionet e institucioneve shëndetësore, kjo përqindje pritet të jetë edhe më e lartë në vitin që po përmbyllet.
Sipas Vitisë, zbulimi i hershëm është mënyra më e mirë, më pak problematike dhe më e lirë për ta mposhtur sëmundjen. Për këtë arsye, ai theksoi nevojën që çdo paciente të ketë mundësi diagnostikimi dhe qasje në pajisje në të gjithë territorin e Kosovës. Vetëkontrollin dhe paraqitjen e hershme te mjeku i cilësoi vendimtare për diagnostikimin në kohë.
Vitia falënderoi mediat për përcjelljen e aktiviteteve dhe për ndihmën që mesazhet e fushatës të arrijnë në çdo shtëpi në Kosovë. Ai e quajti jetik bashkëpunimin kundër kancerit të gjirit dhe përmendi Bujar Gashin, drejtor të Drejtorisë së Shëndetësisë dhe Mirëqenies Sociale në Prishtinë, Albana Gashin, drejtoreshë të Drejtorisë së Shëndetësisë dhe Mirëqenies Sociale në Fushë Kosovë, si dhe Shoqatën Jeta Vita, të drejtuar nga Nafije Latifi. Ai përmendi gjithashtu të gjithë aktorët e tjerë që dhanë kontribut në fushatë.
Gjatë tetorit, edhe kryetarja e Kuvendit të Kosovës, Albulena Haxhiu, u kishte bërë thirrje grave t’i kushtojnë më shumë vëmendje shëndetit dhe të kryejnë kontrolle të rregullta mjekësore, në mënyrë që kanceri i gjirit të zbulohet herët.
