Rikthimi në fushë i Harry Kane pas fitimit të Topit të Artë 2026 nuk shkoi sipas parashikimeve. Sulmuesi anglez, i cili u shpall fitues i çmimit prestigjioz në ceremoninë e zhvilluar në Londër, përjetoi një mbrëmje të vështirë në derbin ndaj Borussia Dortmundit.
Në përballjen e vlefshme për Bundesligën, Bayern Munich kishte mundësinë të shkëputej në krye të klasifikimit, por nuk arriti të përfitonte nga një prej rasteve më të rëndësishme të ndeshjes.
Me bavarezët në avantazhin 1-0, në fillimin e pjesës së dytë, Harry Kane pati mundësinë ideale për të dyfishuar shifrat dhe për t’i dhënë një goditje të rëndë Dortmundit.
Anglezi mori përsipër ekzekutimin e penalltisë, por këtë herë siguria e tij e zakonshme nuk mjaftoi. Goditja e sulmuesit përfundoi në traversë, duke i mohuar Bayernit golin e dytë.
Një gabim që mori edhe më shumë peshë pas përfundimit të takimit, pasi Borussia Dortmund arriti të shmangte humbjen dhe sfida u mbyll në barazim 2-2. Kështu, Bayern humbi mundësinë për të krijuar një shkëputje të rëndësishme në krye të renditjes.
Para fillimit të ndeshjes, Harry Kane ishte në qendër të vëmendjes në “Allianz Arena”. Sulmuesi anglez u prezantua para rreth 75 mijë tifozëve me trofeun e Topit të Artë në duar, ndërsa në fushë ishte vendosur edhe mbishkrimi gjigant “Ëinner”, me germa të arta.
Kane u bë fituesi i parë në fuqi i Topit të Artë që aktivizohet në Bundesligë që prej vitit 1996, kur çmimin e kishte fituar Matthias Sammer, asokohe pjesë e Borussia Dortmundit.