Një tjetër skemë mashtrimi përmes mesazheve telefonike po synon klientët e bankave në Shqipëri.
Sipas pamjeve të mbërritura në redaksi, disa SMS mashtruese që përdorin emrin e Raiffeisen Bank, kanë mbërritur në e-mailin e përdoruesve, me qëllim përvetësimin e të dhënave personale dhe bankare.
Bëhet fjalë për një formë mashtrimi të njohur si “smishing”, ku qytetarët marrin mesazhe që u kërkojnë të përditësojnë ose verifikojnë urgjentisht të dhënat e tyre, me pretendimin se në të kundërt mund t’u pezullohen shërbimet bankare.
Mesazhet përmbajnë lidhje të dyshimta, të cilat i drejtojnë klientët në faqe të rreme. Atyre u kërkohet të vendosin të dhënat personale, numrin e kartës bankare dhe kodet njëpërdorimëshe të sigurisë.
Pasi këto informacione dorëzohen, mashtruesit mund t’i përdorin për të hyrë në llogaritë bankare dhe për të kryer transferta apo pagesa pa autorizimin e klientëve.
Këshillohet që qytetarët të mos klikojnë në lidhjet që vijnë përmes mesazheve të dyshimta dhe të mos ndajnë asnjëherë të dhënat e kartës apo kodet e sigurisë.
Klientëve u këshillohet gjithashtu të aksesojnë shërbimet bankare vetëm përmes kanaleve zyrtare dhe të kontaktojnë menjëherë bankën nëse kanë klikuar në ndonjë link të dyshimtë apo kanë ndarë të dhënat e tyre.
