Kryetarja e Kuvendit të Kosovës, Albulena Haxhiu, kërkoi që Prokuroria Speciale të hetojë veprimet dhe mosveprimet e zyrtarëve institucionalë në rastin e Arlinda Zekajt, e vrarë më 25 tetor në Pejë. Kërkesa u bë më 2 nëntor, ditën kur nisi puna komisionit hetimor parlamentar për shqyrtimin e përgjegjësisë institucionale. Haxhiu tha se hetimi parlamentar duhet të shoqërohet me veprime konkrete nga organet e drejtësisë dhe se komisioni do të përgatisë një raport që do t’i përcillet prokurorisë kompetente. Ajo përshëndeti pezullimin e 11 zyrtarëve policorë, të kryeprokurores së Pejës dhe të prokurores që kishte trajtuar rastin, por kritikoi mosveprimin e institucioneve të tjera, përfshirë Këshillin Gjyqësor dhe Komunën e Pejës, dhe kërkoi masa edhe ndaj zyrtarëve komunalë përgjegjës për mirëqenien sociale.
Komisioni hetimor, i miratuar me 90 vota dhe i përbërë nga 11 deputetë të pushtetit, opozitës dhe komuniteteve joshumicë, do të fokusohet në veprimet dhe mosveprimet e institucioneve që trajtuan rastin e Zekajt dhe më gjerë në trajtimin institucional të dhunës ndaj grave dhe fëmijëve. Kryetari i komisionit, Burim Ramadani, njoftoi se hetimi do të mbështetet në fakte dhe prova dhe do të zhvillohet në tri faza: mbledhjen e provave, vlerësimin dhe përgatitjen e raportit përfundimtar, me afat gjashtë mujor sipas Ligjit për Hetim Parlamentar.
Arlinda Zekaj u vra më 25 tetor në Vitomiricë të Pejës; për vrasjen dyshohet ish-kunati. Para vrasjes, ajo kishte kërkuar mbrojtje dhe kishte paralajmëruar se jeta e saj ishte në rrezik. Gjetjet preliminare të Inspektoratit Policor të Kosovës (IPK) nxorën në pah lëshime: Policia nuk kishte dokumentuar ekzekutimin e një urdhri mbrojtës të lëshuar më 7 shtator, një urdhër i 16 tetorit u zbatuar me vonesë pas ndërhyrjes së IPK-së, dhe drejtuesit policorë nuk trajtuan kërkesën për rivlerësimin e rastit dhe shtimin e masave të sigurisë. Pas vrasjes u pezulluan 11 zyrtarë policorë dhe u ndërmorën masa ndaj prokurores, ndërsa më 30 tetor drejtori i Policisë, Gazmend Hoxha, dha dorëheqje. Ngjarja nxiti protesta dhe kërkesa për llogaridhënie.
Raporti i Institutit të Kosovës për Drejtësi (dhjetor 2024) evidenton rezultate të kufizuara të komisioneve hetimore parlamentare në të kaluarën, duke identifikuar mungesë vullneti politik, bojkot, mungesë kuorumi dhe mangësi ligjore. Kjo përvojë ngre pyetjen nëse komisioni për rastin Zekaj do të identifikojë përgjegjësitë institucionale dhe nxisë ndryshime konkrete, apo do të përfundojë pa rezultate të prekshme.