Një banesë është grabitur mbrëmjen e 31 tetorit në fshatin Finiq. Pre e vjedhjes ka rënë Eleni Anastasi, së cilës i janë marrë 6 800 euro, varëse, bizhuteri dhe sende të tjera me vlerë. Paratë, sipas burimeve policore, e moshuara i kishte kursyer për të kryer një operacion mjekësor.
Ngjarja ka ndodhur rreth orës 18:00–18:30, kur Anastasi kishte shkuar për vizitë te të afërmit, që banojnë jo shumë larg shtëpisë së saj. Kur është kthyer, ka gjetur dyert e shqyera dhe banesën të përmbysur. Pas denoncimit, policia ka mbërritur në vendngjarje dhe ka kryer veprimet e para hetimore. Burime policore të Livadhjasë bëjnë me dije se janë marrë në pyetje si Eleni Anastasi, ashtu edhe bashkëshorti i saj.
Sipas burimeve, çifti është në proces divorci dhe gruaja jeton e vetme në banesën që e ka në pronësi të përbashkët me të shoqin. Ky i fundit kishte shkuar në shtëpi dy ditë para vjedhjes për të marrë rrobat e tij. Për këtë arsye, e moshuara ka shprehur dyshime edhe ndaj bashkëshortit, por deri më tani nuk ka një autor të identifikuar. Policia vijon hetimet për zbardhjen e plotë të ngjarjes.
