Italiani Kimi Antonelli, ka hyrë në histori të Formula 1, duke u bërë kampioni më i ri i botës në këtë sport.
Antonelli e siguroi titullin e tij të parë në vetëm sezonin e dytë në Formula 1, ndërsa gjatë kampanjës së vitit 2026 arriti të thyejë edhe disa rekorde të tjera.
Antonelli u bë piloti më i ri në histori që siguroi një pozitë pole në një garë të dielën. Ai e arriti këtë në Çmimin e Madh të Kinës, në moshën 19-vjeçare, gjashtë muaj e 18 ditë, duke thyer rekordin e mëparshëm të Sebastian Vettel.
Në të njëjtën garë, italiani u bë edhe piloti më i ri që fitoi një garë të Formula 1 pasi ishte nisur nga pozita e parë. Kjo ishte fitorja e tij e parë në një garë të së dielës.
Dy javë më vonë, në Çmimin e Madh të Japonisë, Antonelli regjistroi fitoren e dytë radhazi dhe u ngjit në krye të renditjes së pilotëve. Me këtë, në moshën 19-vjeçare, shtatë muaj e katër ditë, ai u bë piloti më i ri që ka kryesuar ndonjëherë kampionatin botëror, duke thyer rekordin e Lewis Hamiltonit.
Përveç rekordeve personale, Antonelli i dha fund edhe pritjes 73-vjeçare të Italisë për një kampion të ri të botës në Formula 1.
Ai është piloti i tretë italian që fiton titullin e kampionit të botës. Para tij, këtë sukses e kishin arritur Giuseppe “Nino” Farina, kampioni i parë i Formula 1 në vitin 1950, dhe Alberto Ascari, i cili fitoi dy tituj radhazi më 1952 dhe 1953.