Agjencia e Ushqimit dhe Veterinarisë (AUV), ka ndaluar hyrjen në Kosovë të 1,068 kilogramëve patatina “STIZA Potato Chips Paprika”, pasi analizat laboratorike kanë konstatuar nivel të lartë të akrilamidit.
Sipas njoftimit të AUV-së, produktet ishin importuar nga kompania BEST BT SH.P.K. në Prizren dhe i përkisnin LOT-it 909073.
Pas rezultateve të analizave laboratorike, të evidentuara në raportin nr. 4397/2026, Inspektorati Fitosanitar Kufitar ka vendosur ndalimin e hyrjes së ngarkesës në Kosovë dhe kthimin e saj, duke parandaluar kështu daljen e produkteve në treg.
Akrilamidi është një substancë kimike që formohet gjatë përpunimit të ushqimeve me përmbajtje të lartë niseshteje në temperatura të larta, veçanërisht gjatë skuqjes dhe pjekjes. Sipas Autoritetit Evropian për Sigurinë Ushqimore (EFSA), ekspozimi afatgjatë ndaj kësaj substance përmes ushqimit paraqet shqetësim për shëndetin publik, për shkak të potencialit të saj kancerogjen.
AUV ka bërë të ditur se masa vlen vetëm për ngarkesën e identifikuar me LOT 909073, ndërsa ka theksuar se do të vazhdojë kontrollet për të parandaluar hyrjen në treg të produkteve që nuk i plotësojnë kushtet e sigurisë ushqimore.