Ministri i Drejtësisë, Toni Gogu, reagoi në rrjetet sociale pas aludimeve se gjatë një takimi në burgun e Fierit ai i kishte kërkuar kryebashkiakut të Tiranës, Erion Veliaj, të hiqte dorë nga mandati në urdhër të kryeministrit Edi Rama. Gogu pranon se takimi ka ndodhur të premten në IEVP Fier, por sqaron se bisedat ishin vetëm rreth çështjes së aktualizuar të Veliajt: transferimit nga burgu i Durrësit në atë të Fierit dhe për kushtet e trajtimit të tij.
Në reagim, ministri shpreh keqardhje për “të pavërtetat” e publikuara lidhur me vizitën dhe përsërit se vizita ishte kryer “në ushtrim të përgjegjësive të mia si Ministër i Drejtësisë, kam shkuar për t’u njohur me kushtet e trajtimit të tij dhe për të dëgjuar ankesat e shprehura publikisht nga avokati i tij.” Ai thekson se me Veliajn e lidh “një miqësi shumë e hershme, të cilën e dinë të gjithë,” por kundërshton pretendimet se gjatë takimit ka dërguar ndonjë “mesazh” të cilat i janë vënë në gojë.
Gogu saktëson: “Por dua të jem krejt i qartë: Nuk i gjej dot arsyet pse janë stisur ato të pavërteta dhe nuk dua ta besoj që i ka thënë apo shkruar Erioni. Kush më njeh e di se nuk ka asnjë shans, në këtë botë apo në tjetrën, që unë të shqiptoj ‘mesazhet’ që më janë vënë në gojë. Jam vërtet i befasuar.” Ai thotë se ka shkuar për të dëgjuar shqetësimet e një njeriu pas “një tymnaje mediatike” dhe për të trajtuar shqetësimet që lindin kur flitet për liri e të drejta.
Ministri nënvizon se rrethanat e vizitës janë të dokumentuara dhe të verifikueshme dhe përfundon duke theksuar se për pjesët e tjera do të flasin koha dhe e vërteta: “Për të tjerat, koha dhe e vërteta ecin dorë për dore.”