Deputetja e Lidhjes Demokratike të Kosovës (LDK), Hykmete Bajrami, ka kritikuar Projektbuxhetin për vitin 2027, duke thënë se rritja nominale e buxhetit dhe e Bruto Produktit Vendor (BPV) nuk pasqyron gjendjen reale ekonomike të qytetarëve.
Përmes një postimi, Bajrami ka theksuar se nga viti 2021 deri më sot çmimet janë rritur për rreth 34 për qind, duke argumentuar se, pavarësisht rritjes së të ardhurave në euro, fuqia blerëse e qytetarëve është zvogëluar.
“Rritja e buxhetit dhe e Bruto Produktit Vendor në terma nominalë nuk e tregojnë realitetin ekonomik. Sot, mund të marrim më shumë euro, por blejmë shumë më pak se në vitin 2021. Rritja e shifrave në letër nuk do të thotë domosdoshmërisht rritje e mirëqenies së qytetarëve”, ka shkruar Bajrami.
Ajo ka lidhur mungesën e mirëqenies ekonomike edhe me emigrimin, duke pretenduar se rreth 250 mijë qytetarë e kanë lëshuar Kosovën që nga viti 2021.
“Fundja, sikur të kishte mirëqenie, nuk e kishin lëshuar vendin rreth 250 mijë qytetarë nga viti 2021”, ka deklaruar deputetja e LDK-së.
Reagimi i saj vjen pasi Qeveria e Kosovës ka miratuar Projektbuxhetin për vitin 2027, në vlerë prej 4.27 miliardë eurosh.
Gjatë prezantimit të projektbuxhetit, ministri i Financave, Hekuran Murati, ka bërë të ditur se rritja ekonomike për vitin 2027 parashihet të jetë 4.2 për qind, ndërsa të hyrat buxhetore për herë të parë pritet të tejkalojnë vlerën prej katër miliardë eurosh./Telegrafi/
