Eksperti i kriminalistikës Ervin Karamuço ka ngritur dyshime për përfshirjen e shtetasve të huaj në grupet e dhunshme gjatë protestave të zhvilluara në Tiranë.
Sipas Karamuços, gjatë protestave janë vënë re shtetas të huaj nga Italia, Maroku, Gjermania dhe SHBA-ja.
Bazuar në informacione konfidenciale, dy shtetas amerikanë dyshohet se kanë marrë pjesë në mënyrë aktive në episodet e dhunës duke furnizuar me gurë dhe molotovë, tha ai për ABC News.
Eksperti tha se duhet të hetohet se çfarë i ka sjellë këta persona në Shqipëri dhe cili ka qenë roli i tyre gjatë protestave.
“Gjatë këtyre protestave, te një grup i dhunshëm, është vënë re se ka pasur edhe shtetas të huaj: italianë, marokenë, gjermanë dhe amerikanë. Dy amerikanët e fundit, mesa kam pyetur, kanë marrë pjesë në mënyrë aktive, por kjo mbetet ende e pakonfirmuar.
Njëri prej tyre, me një biçikletë me kosh, mbante gurë dhe molotovë dhe ia shpërndante grupit të zjarrit. Një tjetër, nga Kalifornia, shpërndante gurë dhe molotovë. Duhet hetuar se çfarë i ka sjellë këta persona këtu. Disa prej tyre kanë pasur background ushtarak”, tha ai.
