Presidenti amerikan, Donald Trump, u ka bërë thirrje qytetarëve amerikanë që të dalin masivisht në votime në zgjedhjet e mesmandatit, duke vënë theksin te mobilizimi i mbështetësve të tij për të siguruar një fitore të thellë.
Gjatë një ndërhyrjeje telefonike në televizionin Fox News, në prag të zgjedhjeve, Trump u kërkoi votuesve që të marrin pjesë në proces, duke bërë edhe një batutë për praninë e emrit të tij në fletën e votimit.
“Duhet të shkoni të votoni, të bëni sikur unë jam në fletën e votimit, bëni çfarë të doni, por duhet të votojmë. Nëse njerëzit tanë votojnë, fitojmë me një diferencë dërrmuese”, deklaroi kreu i Shtëpisë së Bardhë.
Zgjedhjet e mesmandatit konsiderohen një provë e rëndësishme politike për administratën amerikane, pasi përcaktojnë përbërjen e Kongresit dhe ndikojnë drejtpërdrejt në aftësinë e presidentit për të çuar përpara agjendën e tij politike.
