Ku i gjetët 4 makinat e ujit? Të dënohet dhuna ndaj studentëve/ Përplasje në Komisionin e Shëndetësisë, opozita mbyll mbledhjen. Shalsi: Sjellja juaj në kufijtë e komikes

Bardh Spahia kundërshtoi projektbuxhetin, duke e cilësuar atë si një buxhet që nuk u shërben qytetarëve, por interesave të një grupi të ngushtë njerëzish. Ndërsa Erisa Xhixho, ngriti akuza për standarde të dyfishta në drejtësi dhe denoncoi, sipas saj, presionin dhe intimidimin e të rinjve protestues.

Debati u përshkallëzua edhe gjatë përplasjes mes Bardh Spahisë dhe Eduart Shalsit, ku nuk munguan replikat dhe akuzat politike.

Pjesë nga debati:

Bardh Spahia: Është absurde të ulesh e të pretendosh e të diskutosh për një buxhet i cili mbart në vetvete vetëm interesin e një grusht njerëzish, të cilët kanë vendosur që nëpërmjet parave publike, parave të qytetarëve shqiptarë të mbushin xhepat e tyre me qindra e miliona euro, që tjetërsohen. E në vend që të sigurojnë shërbime, pajisje, trajtime jetike për popullin shqiptar, sot shkojnë në xhepat e pushtetarëve shqiptarë. E kemi parë se si është hartuar apo konceptuar ky projektbuxhet, pa asnjë lloj konsultimi. E kemi parë dhe te paketa fiskale që u prezantua nga kryeministri, e cila është kthyer në një barrë të madhe e të rëndë për qytetarët shqiptarë.

Erisa Xhixho: Belinda Balluku në liri, kjo Karçanaj kishte shkuar në SPAK, në liri për organizatë kriminale e të rinjtë burgosen nga 3 e 4 ditë. 20 ditë i kishit dhënë burg një të riu te Shkencat e Natyrës. Vlora Hyseni në liri. Këto në liri, fukarenjtë në burgje, fukarenjtë me gjoba. Kam takuar 15-vjeçarin që i ishte vënë thika në qafë dhe i thoshte: ai ishte i paguar në protestë. Kaq të dëshpëruar jeni për të gjetur filma Netflix. Thika i ishte vënë brenda makinave të paidentifikuara, banditë që terrorizojnë të rinjtë nëpër rrugica, që u shkojnë nëpër shtëpi. Turp, nuk janë të denjë për atë uniformë të Policisë së Shtetit. Belinda Balluku në liri, Mirlinda Karçanaj në liri, Vlora Hyseni në liri e të rinjtë tanë të burgosur. Pasuria e Belindës me Mirlindën 2 miliardë euro shkon. Ndërkohë që studentët nuk mbyllin dot muajin, kjo është banda që na drejton.

Janë blerë nja 4 bote uji me urgjencë për të shpërndarë protestuesit. Këto 4 bote uji nga mbinë? Apo kanë lekë shteti për të shpërndarë protestuesit, për pensione, për atë PET scan-in, për mbështetje për studentët, nuk ka ky shtet. Gjithashtu dronë, ça janë këto dronë? Dronë keni blerë, dronë pa vulën e Policisë së Shtetit që vijnë vërdallë e identifikojnë protestuesit.

Shkon ministri i Shëndetësisë pa urdhër, pa gjë, shkon e shantazhon aty, i thotë dhe mik i Erion Velisë. Këtu duhet të ketë një hetim të plotë të gjithë ngjarjes, të shantazhit, të gjuhës mafioze që ju përdorni. Dhe në fakt ato mesazhe treguan që këtu kemi 1 mafie që ka kapur shtetin dhe kjo është axhenda nr. 1 e këtij parlamenti, nuk ka asnjë axhendë tjetër. Ju duhet të reflektoni, të distancoheni nga ky kryeministër që drejton 1 organizatë kriminale, që e ka kthyer tërë në një lavatriçe të pastrimit të parave. Nuk mund të vazhdojë në normalitet ky parlament që bën gjoja sikur diskuton buxhetin, paketën fiskale.

Ky buxhet i 2027 është buxhet që duhet të hakmerret ndaj protestuesve, rrisni taksën, rrisni TVSH-në në 21%, rrisni tatimfitimin, rrisni dividendin. Po a e dini që jeni në suficit? 52% të parealizuara shpenzimet në Bashkinë e Tiranës, mos flas për suficit janar-shtator që jeni miliona euro në suficit. Pse doni t’i rrisni prapë taksat? Për çfarë? Për t’i vjedhur në megaafera korruptive?

Bardh Spahia:  Edhe pse dëgjova nga kolegët e mazhorancës të shqetësuar për dhunën ndaj institucioneve.

Eduard Shalsi: Po dëgjoni 2 fjalë, pse keni frikë? Ke akoma.

Bardh Spahia: Nuk ka vend në këtë komision për propagandë të dalë boje, në vend t’i kishin harxhuar lekët për makinat e ujit për jetën e qytetarëve.

Eduard Shalsi: Vazhdoni, rrugë të mbarë. Keni çuar në kufijtë e komikes sjelljen tuaj.

Bardh Spahia: Mbledhja konsiderohet e mbyllur me rregullore, pastaj merrni ju vendimin për ta rifilluar, por konsiderohet e mbyllur kur ngrihet kryetari.

Top Channel