Alarm për bombë në Poloni/ Avioni me 181 pasagjerë bën ulje emergjente, mbyllet aeroporti
Një avion pasagjerësh me 181 persona në bord, që ishte nisur nga Londra drejt Polonisë, ka kryer ulje emergjente në aeroportin Varshavë-Modlin, pas një alarmi për bombë në bord.
Avioni ndryshoi itinerarin dhe u ul në aeroportin Varshavë-Modlin, rreth 40 kilometra në veri të qendrës së kryeqytetit polak. Pas incidentit, aeroporti u mbyll deri në një njoftim të dytë, në mënyrë që shërbimet e sigurisë të kryenin kontrollet e nevojshme.
“Avioni u ul në mënyrë të sigurt dhe shërbimet e sigurisë po verifikojnë kërcënimin e raportuar”, thuhet në njoftim.
Sipas të dhënave të faqes së monitorimit të fluturimeve FlightAëare, bëhet fjalë për një avion të tipit Boeing 737 MAX 8, i cili u nis nga aeroporti Heathrow i Londrës në orën 06:54 të mëngjesit dhe u ul në Modlin në orën 09:59, sipas orës lokale.
Deri më tani nuk është konfirmuar prania e ndonjë mjeti shpërthyes në avion, ndërsa mbetet e paqartë se kur do të rifillojë normalisht puna në aeroport.
