Barcelona e harron humbjen ndaj PSG dhe rikthehet te fitorja në Ligën e Kampioneve.
Në Camp Nou, skuadra e drejtuar nga Hansi Flick iu imponua Aston Villës duke e mundur 3-0 duke i shkaktuar humbjen e parë skuadrës angleze
Në pjesën e parë skuadrat zhvilluan një lojë të hapur. Barcelona mori avantazhin që në minutën e 7 me golin e Lamine Yamal. Aston Villa reagoi dhe krijoi mundësitë e saj për të shënuar dhe në ndonjë moment ishte Joan Garcia që shpëtoi portën e katalanasve. Në krahun tjetër, skuadra e Hansi Flick pati mundësitë për të shënuar një gol tjetër, por në fund skuadrat shkuan në pushimin e ndeshje me rezultatin 1-0 në favor të Barcelonës.
Pjesa e dytë nisi me një shans të mirë të Barcelonës për të shënuar golin e dytë me Lamine Yamal, por portieri Suzuki e ndali gjuajtjen e 19 vjeçarit. Nuk vonoi shumë dhe katalanasit shënuan edhe fgolin e dytë, tani me Raphinhan për të çuar rezultatin në 2-0 me brazilianin që u shërbye mjaft mirë nga Fermin Lopez.
Kaluan vetëm 8 minuta dhe Raphinha ndëshkoi sërish skuadrën e Unai Emery duke shënuar golin e tretë për Barcelonën dhe të dytin personal për të fiksuar fitoren 3-0 të blaugranave që tani e shohin veten në vendin e dytë të renditjes me 9 pikë.
PSG luan ‘tenis me Villareal
PSG nuk pati mëshirë për Villarrealin në Ceramica teksa e mundi me rezultatin e thellë 6-0. Kampionët e Evropës e zgjidhën këtë ndeshje praktikisht që në 17 minutat e para të ndeshjes teksa shënuan plot 4 herë ku për skuadrën e drejtuar nga Luis Enrique shënuan Joao Neves në minutën e 9, Desire Doue në të 12, Mayulu në të 13 dhe Fabian Ruiz në të 17.
Në fillimin e pjesës së dytë, parizienët shënuan edhe golin e pestë, sërish me Fabian Ruiz që plotësoi dygolëshin e tij personal. Në minutën e 78 shënoi edhe Boly për të fiksuar fitoren tenistike 6-0 të parizienëve që kryesojnë me 12 pikë të plota.
Interi harron disfatën në derbi, zikaltrit shënojnë tre gola për tre pikë në Holandë
Interi ka triumfuar me rezultatin 3-0 në transfertën ndaj Feyenoordit, në ndeshjen e vlefshme për Champions League, duke siguruar tri pikë të rëndësishme në rrugëtimin evropian.
Skuadra e drejtuar nga zikaltërit e nisi mjaft mirë takimin dhe kaloi në avantazh që në minutën e 8-të. Yann Bisseck ishte autori i golit të parë, pas një aksioni të ndërtuar nga Djed Spence.
Në minutën e 34-t, Interi dyfishoi shifrat me anë të Francesco Pio Espositos. Sulmuesi italian përfitoi nga një kundërsulm i shpejtë dhe dërgoi topin në rrjetë me kokë, duke i dhënë skuadrës së tij një avantazh të dyfishtë që në pjesën e parë.
Në fraksionin e dytë, miqtë vulosën fitoren me golin e tretë. Piotr Zielinski realizoi në minutën e 54-t, me një goditje të saktë nga distanca, pas asistit të Nicolo Barellas.
Feyenoord u përpoq të reagonte, por nuk arriti të gjente rrugën e rrjetës përballë skuadrës italiane. Kështu, Interi largohet nga Roterdami me një fitore 3-0, duke konfirmuar forcën e tij në këtë ndeshje të Champions League.
Manchester United përmbys Romën dhe rikthehet te fitorja pas dy muajsh
Manchester United ka dhuruar një përmbysje spektakolare në “Old Trafford”, duke mposhtur Romën me rezultatin 3-2, në një ndeshje dramatike të Champions League.
“Djajtë e Kuq” arritën të përmbysnin disavantazhin e dy golave, duke reaguar fuqishëm në pjesën e dytë.
Roma e nisi më mirë takimin dhe kaloi në avantazh që në minutën e 11-të me Matías Soulé, pas asistit të Rodrigo Mora. Në minutën e 17-të, miqtë dyfishuan shifrat me Donyell Malen, i cili u tregua i saktë nga pika e bardhë e penalltisë, pas një prekjeje të topit me dorë në zonë nga Ayden Heaven.
United e mbylli pjesën e parë në disavantazhin e dy golave, por në fraksionin e dytë ndryshoi gjithçka. Në minutën e 58-të, Bruno Fernandes shkurtoi diferencën nga pika e bardhë, duke rikthyer shpresat e vendasve.
Protagonisti i madh i përmbysjes ishte Matheus Cunha. Sulmuesi brazilian realizoi dy herë, fillimisht në minutën e 83-të për të barazuar rezultatin dhe më pas në minutën e 86-të, kur shënoi golin e fitores pas asistit të Shea Lacey.
Kështu, Manchester United siguroi një triumf të rëndësishëm 3-2, pas një ndeshjeje ku u gjend në vështirësi që në pjesën e parë, por arriti të përmbyste gjithçka në 45 minutat e dyta. Roma, nga ana tjetër, largohet nga “Old Trafford” pa pikë, pavarësisht avantazhit të dyfishtë që kishte krijuar.
