Policia ka zbardhur vrasjen e ndodhur më 3 nëntor në fshatin Godvi të Bulqizës, ku humbi jetën shtetasi Urim Fiku.
Fillimisht, familjarët kishin raportuar se 57-vjeçari kishte ndërruar jetë pas një sulmi nga një kafshë e egër, konkretisht një ari.
Por hetimet e kryera nga specialistët e Sektorit për Hetimin e Krimeve të Rënda në Drejtorinë Vendore të Policisë Dibër, në bashkëpunim me Prokurorinë, zbuluan një tjetër të vërtetë për ngjarjen.
Nga ekzaminimet mjekoligjore dhe veprimet hetimore rezultoi se viktima ishte vrarë me armë zjarri.
Në vijim të hetimeve, policia ka ndaluar bashkëshorten e viktimës, 57-vjeçaren Sadete Fiku dhe djalin e tij, 33-vjeçarin Gazmir Fiku, të dy banues në fshatin Godvi.
Ata dyshohen se, në bashkëpunim me njëri-tjetrin, kanë vrarë familjarin e tyre duke përdorur armë zjarri dhe mjete të forta prerëse.
Gjatë veprimeve hetimore, policia ka sekuestruar një pistoletë model 54, së bashku me fishekë, si dhe një gëzhojë pistolete, e cila u gjet në oborrin e banesës.
Materialet procedurale i janë referuar Prokurorisë së Dibrës për veprat penale “Vrasja për shkak të marrëdhënieve familjare” dhe “Mbajtja pa leje e armëve dhe municioneve”, kryer në bashkëpunim.
