VIDEO/ Humb jetën në spital këmbësori i aksidentuar në Levan

Një 74-vjeçar, i cili u aksidentua pasditen e sotme në aksin rrugor Levan–Vlorë, në rrugën e vjetër, ka ndërruar jetë në Spitalin Rajonal të Fierit.

Sipas informacionit paraprak të Policisë, aksidenti ndodhi rreth orës 18:00, kur një automjet i drejtuar nga një 58-vjeçar, me inicialet A. B., përplasi këmbësorin A. Sh., 74 vjeç, banues në fshatin Levan.

I moshuari u transportua në spital për të marrë ndihmë mjekësore, por nuk mundi t'u mbijetonte plagëve të marra.

Drejtuesi i automjetit është shoqëruar në Komisariat për veprime të mëtejshme. Nga testi i alkoolit rezultoi se ai nuk kishte konsumuar alkool.

Grupi hetimor vijon punën për të sqaruar rrethanat dhe shkakun e aksidentit.