Arsenali ka kërkuar ndihmën e NASA-s, Google dhe Apple në përpjekjet për të reduktuar lëndimet e futbollistëve dhe për të përshpejtuar procesin e rikuperimit. Sipas Daily Mail, strategjia e Mikel Artetës për të përfituar çdo avantazh të mundshëm ka shkuar përtej kufijve të zakonshëm të futbollit.
Çështja është rikthyer në vëmendje pas lëndimit të Bukayo Sakës, i cili pësoi një tërheqje muskulore në kofshë gjatë ndeshjes ndaj Bayern Munichut dy javë më parë. Reprezentuesi anglez pritet të mungojë nga katër deri në gjashtë javë, ndërsa ky është lëndimi i tij i 11-të që nga shtatori i vitit 2024.
Sipas raportimit, në sezonet e fundit stafi i Arsenalit është ngarkuar të kontaktojë kompani të mëdha ndërkombëtare për të kërkuar ide inovative që mund të ndihmojnë në parandalimin e lëndimeve dhe rikuperimin e lojtarëve.
NASA ishte konsultuar më herët gjatë periudhës së Artetës në krye të klubit për fiziologjinë në hapësirë, me fokus të veçantë te lëndimet e ligamentit ACL. Në kushte të gravitetit të reduktuar, muskujt mund të pësojnë atrofi dhe kockat të humbasin densitetin, ndërsa Arsenali besonte se këto studime mund të ofronin të dhëna të vlefshme për procesin e rehabilitimit.
Hulumtimet synonin të ndihmonin në përcaktimin e ngarkesës që duhet të mbajë një futbollist i lënduar, ritmit me të cilin duhet të rritet ajo dhe mënyrës se si ushtrimet në kushte të gravitetit të reduktuar mund t’i mundësojnë lojtarit të rifillojë vrapimin më herët.
Google, një nga partnerët zyrtarë të klubit londinez, është konsultuar për analizën e të dhënave, me qëllim identifikimin e modeleve që mund të lidhen me rrezikun e lëndimeve.
Ndërkohë, Apple është përfshirë në diskutimet për teknologjinë e pajisjeve që mbahen në trup, përfshirë Apple Watch, të cilat mund të monitorojnë rrahjet e zemrës dhe intensitetin e ushtrimeve.
Sipas raportimit, marka globale e Arsenalit i shërben klubit si një “pasaportë” për të hyrë në organizata të nivelit më të lartë në botë dhe për të përfituar nga ekspertiza e tyre.
Sezoni aktual ka qenë më pak i ndikuar nga lëndimet. Përveç Sakës dhe William Salibas, jashtë fushave kanë qëndruar për periudha të caktuara edhe Christos Tzolis, Ben White dhe Cristhian Mosquera, ndërsa Eberechi Eze së fundmi pësoi një lëndim, natyra e të cilit nuk është bërë e ditur.
Ajo që e ka irrituar më së shumti Artetën, sipas raportimit, është mungesa e lojtarëve kyç në momentet vendimtare. Kjo përfshin mungesën e Salibas në fazën përfundimtare të garës për titull në sezonin 2022/23, si dhe lëndimet e Jesusit dhe Kai Havertz në janar të vitit 2025.
Për Arsenalin, përpjekjet për të minimizuar lëndimet nuk janë thjesht çështje shëndetësore, por edhe një faktor që mund të ndikojë drejtpërdrejt në ambiciet për trofe./Telegrafi/
