Kryeministri izraelit, Benjamin Netanyahu, ka bërë thirrje për formimin e një qeverie të gjerë kombëtare të udhëhequr nga partia Likud, duke paralajmëruar se një qeveri e majtë e mbështetur nga partitë arabe do ta “shkatërronte” Izraelin nga brenda.
Netanyahu deklaroi se islamizmi radikal përbën kërcënim për Izraelin si nga jashtë, përmes Iranit dhe grupeve aleate të tij, ashtu edhe nga brenda, përmes partive islamiste që, sipas tij, mbështesin terrorizmin.
“Një qeveri e varur nga këto parti nuk do të luftojë armiqtë tanë, por do të na shkatërrojë nga brenda. Kjo është çështje jete a vdekjeje”, tha ai.
Kryeministri izraelit akuzoi liderët e bllokut të majtë se po përpiqen të formojnë një qeveri të pakicës, e cila do të varej nga mbështetja e partive arabe. Sipas tij, një qeveri e tillë nuk do të ishte në gjendje të përballej me kërcënimet e sigurisë ndaj vendit.
Netanyahu pretendoi gjithashtu se liderët e bllokut të majtë po vendosin kushte të pamundura për të penguar formimin e një qeverie të gjerë kombëtare. Ai theksoi se një qeveri e udhëhequr nga Likud do të ishte më e përshtatshme për të garantuar sigurinë dhe stabilitetin e Izraelit.
Deklaratat e tij vijnë në një kohë kur partitë politike izraelite po përpiqen të sigurojnë mbështetjen e nevojshme për formimin e qeverisë së ardhshme, ndërsa çështja e bashkëpunimit me partitë arabe mbetet një nga temat më të debatueshme në politikën e vendit. /Telegrafi/
