Një sulm kibernetik ka vënë në shënjestër shërbimin kombëtar të transfuzionit të gjakut në Francë, duke rrezikuar rezervat jetike të plazmës që përdoren për transfuzione dhe prodhimin e medikamenteve.
Sipas autoriteteve franceze, hakerat kanë depërtuar në sistemet e kontrollit të tre ambienteve frigoriferike, ku ruhen produkte të gjakut, dhe kanë ndryshuar pragjet e temperaturës dhe shkrirjes, duke i çuar ato në nivele shumë të larta.
Ngjarja ka ndodhur gjatë natës së së hënës. Megjithatë, sistemet e alarmit kanë identifikuar menjëherë anomalitë, duke u dhënë mundësi teknikëve të ndërhyjnë përpara se rezervat të dëmtoheshin. Qeset e plazmës janë siguruar ose transferuar në ambiente të tjera dhe, sipas shërbimit francez të gjakut, nuk ka pasur humbje të produkteve apo pasoja shëndetësore.
Sulmi nuk ka goditur drejtpërdrejt institucionin EFS, por sistemet frigoriferike të administruara nga kompani kontraktore. Shërbimi kombëtar francez i gjakut furnizon më shumë se 1,900 spitale në vend dhe mbështet mbi një milion pacientë çdo vit.
Autoriteti francez për sigurinë kibernetike dhe Ministria e Shëndetësisë janë njoftuar për incidentin, ndërsa hetimet vijojnë për të përcaktuar mënyrën e ndërhyrjes dhe përgjegjësit.
Ngjarja vjen në një kohë kur disa vende europiane po përballen me një valë sulmesh ndaj sistemeve të frigoriferëve dhe ngrirësve në supermarkete. Probleme të ngjashme janë raportuar në Itali, Gjermani, Rumani, Mbretërinë e Bashkuar dhe disa vende të tjera, ku ndryshimi i temperaturave ka shkaktuar dëme të konsiderueshme në produktet ushqimore.
Deri më tani nuk ka një autor të identifikuar dhe asnjë grup nuk ka marrë përgjegjësinë për sulmet. Ekspertët nuk përjashtojnë mundësinë e ndërhyrjeve të sponsorizuara nga shtete, por as skenarin e një sulmi të kryer nga një haker i vetëm.
