TOKIO– Katër vendet e Grupit Quad, Shtetet e Bashkuara të Amerikës, Japonia, Australia dhe India, kanë nisur një stërvitje të përbashkët ushtarake detare në ujërat pranë rajonit Kanto, në afërsi të Tokios.

Stërvitja, e koduar “Malabar”, do të zgjasë deri më 12 nëntor dhe synon forcimin e bashkëpunimit dhe koordinimit ushtarak mes katër vendeve.

Sipas forcave detare japoneze, gjatë manovrave do të zhvillohen ushtrime për përballimin e kërcënimeve nga nëndetëset, si dhe skenarë të ndryshëm të operacioneve detare.

Siç raportoi agjencia japoneze e lajmeve Kyodo, ceremonia e hapjes u zhvillua në bordin e anijes japoneze për transportin e helikopterëve “Ise”, e ankoruar në bazën detare të Yokosukës, pranë Tokios.

Në ceremoninë zyrtare, zëvendësadmirali Katsushi Omachi, komandant i flotës japoneze, theksoi rëndësinë e bashkëpunimit mes vendeve pjesëmarrëse.

“Mjedisi i sigurisë në rajonin Indo-Paqësor po bëhet gjithnjë e më kompleks”, deklaroi ai.

Stërvitja “Malabar” zhvillohet në kuadër të bashkëpunimit të vendeve të Quad, një partneritet strategjik mes SHBA-së, Japonisë, Australisë dhe Indisë, me fokus sigurinë dhe stabilitetin në rajonin Indo-Paqësor.