Tiranë, 31 gjoba pas protestës së djeshme, procedohen penalisht dy persona

Policia e Tiranës ka vendosur 31 masa administrative ndaj protestuesve që bllokuan rrugën dhe penguan qarkullimin e automjeteve gjatë tubimit të zhvilluar pasditen e djeshme në bulevardin “Dëshmorët e Kombit”.

Sipas policisë, gjobat janë vendosur pasi qytetarët nuk iu bindën thirrjeve të përsëritura të efektivëve për lirimin e rrugës dhe lejimin e qarkullimit të mjeteve.

Për secilin prej 31 personave është vendosur gjobë në vlerën 5 mijë lekë, në zbatim të Aktit Normativ nr. 5, datë 28 tetor 2026.

Ndërkohë, dy shtetas me inicialet D.G. dhe E.L. janë proceduar penalisht për mosbindje ndaj urdhrit të punonjësve të policisë, pasi nuk kanë pranuar të paraqesin dokumentet e identifikimit.

Materialet procedurale për të dy rastet i janë referuar Prokurorisë për veprime të mëtejshme.

/vizionplus.tv