Pa tifozë në Budapest, Bjellorusi-Shqipëri luhet nën hijen e sanksioneve të UEFA-s

Kombëtarja do të luajë pa praninë e tifozëve ndeshjen e fundit të Grupit C1 në UEFA Nations League ndaj Bjellorusisë, e programuar më 15 nëntor në stadiumin “Illovszky Rudolf” në Budapest të Hungarisë.

Federata Shqiptare e Futbollit bën me dije se takimi do të zhvillohet pa spektatorë për shkak të sanksioneve të vendosura nga UEFA ndaj Bjellorusisë.

Sipas vendimit të Komitetit Ekzekutiv të UEFA-s, të marrë më 3 mars 2022 dhe që vijon të jetë në fuqi, ekipet kombëtare dhe klubet bjelloruse duhet t’i zhvillojnë ndeshjet si pritëse në terrene neutrale dhe pa praninë e tifozëve.

Për rrjedhojë, edhe pse ndeshja do të luhet në Budapest, tifozët shqiptarë nuk do të kenë mundësi ta ndjekin përballjen nga shkallët e stadiumit.

Kjo do të jetë ndeshja e fundit e kuqezinjve në fazën e grupeve të UEFA Nations League, në kuadër të Grupit C1.