Ministri i Ekonomisë dhe zëvendëskryeministri i Bavarisë, Hubert Aiwanger, është gjetur i pajetë në një dhomë hoteli në Berlin, në moshën 55-vjeçare.
Sipas raportimeve të mediave gjermane, Aiwanger ndodhej në Berlin për inaugurimin e zyrës së re të partisë së tij, Freie Wähler (Votuesit e Lirë), ku ishte planifikuar të mbante një fjalim.
Megjithatë, ai kishte anuluar pjesëmarrjen për arsye shëndetësore dhe ishte zëvendësuar nga një përfaqësues tjetër i partisë. Më pas, politikani nuk ishte bërë më i arritshëm dhe u gjet pa shenja jete në dhomën e hotelit Neuer Fritz, në qendër të kryeqytetit gjerman.
Deri më tani nuk është bërë i ditur shkaku i vdekjes. Prokuroria dhe policia kanë nisur një procedurë hetimore për të sqaruar rrethanat dhe për të përjashtuar mundësinë e përfshirjes së personave të tjerë.
Sipas raportimeve të fundit, autoritetet kanë planifikuar kryerjen e autopsisë për të përcaktuar shkakun e saktë të vdekjes. Hetimet vijojnë dhe deri tani nuk është konfirmuar zyrtarisht një shkak përfundimtar.
Kryeministri i Bavarisë, Markus Söder, ka shprehur tronditjen e tij pas lajmit për ndarjen nga jeta të zëvendësit të tij.
“Vdekja e papritur e Hubert Aiwanger është një tragjedi absolute. Të gjithë jemi thellësisht të tronditur”, shkroi Söder në rrjetin social X.
Ai shtoi se mendimet e tij janë me familjen dhe fëmijët e politikanit në këto momente të vështira.
Kush ishte Hubert Aiwanger?
Hubert Aiwanger lindi më 26 janar 1971 në Ergoldsbach, në Bavarinë e Poshtme. Ai ishte një nga figurat kryesore të partisë Freie Wähler, të cilën e drejtonte në nivel rajonal dhe kombëtar. Në vitin 2008 hyri për herë të parë në parlamentin rajonal të Bavarisë, ku mori drejtimin e grupit parlamentar të partisë së tij.
Pas zgjedhjeve të vitit 2018, Freie Wähler u bë pjesë e qeverisë rajonale në koalicion me CSU-në, ndërsa Aiwanger mori postin e zëvendëskryeministrit dhe ministrit të Ekonomisë së Bavarisë. Ai lë pas partneren e tij, Tanja Schweiger, dhe dy fëmijët e tyre.
