Talenti i Young Boys, Lutfi Dalipi, nuk do të luajë për përfaqësuesen e Zvicrës. Futbollisti 20-vjeçar, i cili është i huazuar te Vaduz, ka marrë vendimin për të mos e përfaqësuar më këtë shtet, raportoi mediumi zviceran Blick. Federata Zvicerane e Futbollit (SFV) humbet kështu një tjetër lojtar premtues të formuar në Zvicër.
Dalipi po bie në sy me paraqitjet për Vaduzin në Superligë, ndërsa për të kanë shfaqur interes klube të njohura evropiane, mes tyre Stuttgart, Hoffenheim, Frankfurt dhe Salzburg. Sipas raportimeve, disa prej tyre janë të gatshme të paguajnë dhjetëra milionë dollarë për transferimin e tij.
Të lidhura
None found
Para se të përcaktojë hapin e radhës në karrierën me klubet, futbollisti nga rajoni i Gruyere duhet të zgjedhë se cilën kombëtare do të përfaqësojë. Krahas Zvicrës, ai ka mundësi të luajë për Kosovën, Shqipërinë ose Portugalinë, ndërsa federatat shqiptare dhe kosovare po e ndjekin nga afër.
Të shtunën e kaluar, në Cyrih, thuhet se u mbajt një takim mes Dalipit dhe përfaqësuesve të Federatës Shqiptare të Futbollit. Vendimi i tij përfundimtar pritet të bëhet i ditur gjatë javëve në vijim.
Emri i mesfushorit nuk ishte në listën e publikuar të enjten në mëngjes nga trajneri i Zvicrës, Murat Yakin. Ai e përshkroi Dalipin si një lojtar të ri e interesant, që ka tërhequr vëmendjen me statistikat e tij, por shtoi se konkurrenca e madhe në mesfushën qendrore e vështirëson përfshirjen e tij në skuadër.
Dalipi nuk pranoi as ftesën për ekipin U21 të Zvicrës për ndeshjet e ardhshme ndërkombëtare. Ai shpjegoi se nuk dëshiron t’ia zërë vendin një lojtari tjetër, përderisa ende nuk e ka marrë vendimin përfundimtar.
Sipas raportimeve, 20-vjeçari i ka premtuar gjyshit se në të ardhmen do të luajë për Shqipërinë ose Kosovën.
Largimi i mundshëm i Dalipit do të ishte një tjetër humbje për futbollin zviceran. Gjatë një viti e gjysmë të fundit, SFV ka humbur edhe Leon Avdullahun, Albian Hajdarin dhe Alessandro Romanon, lojtarë premtues të zhvilluar në Zvicër.
Yakin tha se federata nuk mund të vendosë se cilin shtet zgjedhin lojtarët me shtetësi të dyfishtë. Sipas tij, thirrjet në kombëtare duhet të kenë arsye sportive dhe nuk mund të bëhen vetëm për t’u dhënë lojtarëve disa minuta, në mënyrë që të angazhohen zyrtarisht me Zvicrën. Ai shtoi se kjo duhet të jetë e drejtë ndaj futbollistëve që kanë qenë pjesë e ekipit prej më gjatë.
