Të paktën 11 efektivë policie janë arrestuar që prej 25 tetorit. Ata dyshohen për shpërdorim të detyrës zyrtare, keqtrajtim dhe torturë.
Që prej rënies së regjimit të Aleksandar Vučić-it në zgjedhjet e 25 tetorit, të paktën 11 efektivë policie janë arrestuar në kuadër të dy aksioneve, mes tyre zyrtarë të lartë të policisë, punonjës aktivë dhe një ish-efektiv policie në pension.
Ata dyshohen për shpërdorim të detyrës zyrtare, keqtrajtim dhe torturë. Rastet përfshijnë edhe ngjarje të ndodhura gjatë periudhës së qeverisjes së mëparshme.
Kricak dhe Sekulović
Në operacionin e parë u arrestuan drejtuesi i Drejtorisë së Policisë Kriminale, Marko Kričak, dhe drejtuesi i Shërbimit për Luftën kundër Krimit të Ministrisë së Punëve të Brendshme (MUP), Boško Sekulović. Arrestimet u kryen me urdhër të Prokurorisë së Lartë Publike në Beograd.
Sipas prokurorisë, dyshohet se gjatë periudhës 12 maj – 3 qershor 2026, në kuadër të procedurave për çështjen e vrasjes së Aleksandar Nešović Baja në restorantin “27”, në lagjen Senjak, ata tejkaluan dhe shpërdoruan kompetencat e tyre zyrtare. Përmes moskryerjes së detyrave zyrtare, ata dyshohet se i shkaktuan dëm dhe shkelën rëndë të drejtat e ish-drejtuesit të policisë së Beogradit, Veselin Milić.
Akuzat veçanërisht të rënda lidhen me trajtimin e të dyshuarit NL nga Kričak. Prokuroria dyshon se më 16 maj, në ambientet e Drejtorisë së Policisë Kriminale, Kričak, së bashku me efektivë të tjerë policie, ende të paidentifikuar, keqtrajtoi dhe torturoi të dyshuarin, shkruan Vreme.
Sipas përshkrimit të prokurorisë, viktimës iu vendos një kapuç në kokë, u godit në kokë, u mbyt me forcë dhe më pas iu hoqën çorapet, ndërsa shputat e këmbëve dhe shpina iu goditën me rrip. Si pasojë e dëmtimeve, raportohet se ai pësoi edhe hematoma.
Kricak akuzohet për shpërdorim të detyrës zyrtare, keqtrajtim dhe torturë, ndërsa Sekulović për shpërdorim të detyrës zyrtare.
Përpara se të emërohej në krye të Drejtorisë së Policisë Kriminale (UKP), Kricak ishte komandant i Njësisë për Sigurinë e Personave dhe Objekteve të Veçanta (JZO). Ai u emërua në detyrën e re më 30 dhjetor 2025. Më parë kishte punuar edhe në Agjencinë e Sigurisë dhe Informacionit (BIA), në Shërbimin për Luftën kundër Krimit të Organizuar dhe në njësi të tjera organizative të MUP-it.
Pas arrestimit të Kričakut, Prokuroria e Parë Themelore në Beograd mori një udhëzim të detyrueshëm nga Prokuroria e Lartë Publike për të trajtuar çështjen e Nikolina Sinđelić dhe studentëve të tjerë, të cilët e akuzuan Kričakun për keqtrajtim të tyre në garazhin e ndërtesës së Qeverisë së Serbisë, pas protestës së zhvilluar në gusht të vitit të kaluar.
Përveç dyshimeve për fshehje të provave në çështjen e Senjakut, Sekulović dyshohet gjithashtu se ka përdorur forcë fizike ndaj disa të dyshuarve gjatë procedurave për këtë çështje, duke i rrahur dhe keqtrajtuar në ambientet e policisë gjatë marrjes në pyetje.
Nëntë apo dhjetë persona të ndaluar për keqtrajtim
Në një operacion tjetër u arrestuan tetë efektivë policie në detyrë dhe një ish-punonjës i policisë.
Ndër personat e identifikuar publikisht janë komandanti i Njësisë Speciale Kundër Terrorizmit (SAJ), Igor Žmirić, dhe drejtori në detyrë i Njësisë së Posaçme të Paraburgimit në Burgun e Qarkut në Beograd, Milan Vuković, i njohur më mirë si Baka.
Për të dyshuarit e tjerë, deri tani janë bërë të ditur vetëm inicialet: BJ (48), DV (48), JO (43), VL (48), ND (50), NF (53) dhe ZV (54).
E përditshmja “Danas” raportoi se është arrestuar edhe zëvendësi i Žmirićit, ndihmësi i tij Goran Filipović. Kjo do të thotë se numri i përgjithshëm i efektivëve të policisë të ndaluar mund të jetë në të vërtetë 12, por ky informacion nuk është konfirmuar zyrtarisht.
Sipas informacioneve të gazetës “Danas”, Filipović u arrestua së bashku me Žmirićin dhe tetë persona të tjerë, nën dyshimin se verën e kaluar, kur ishin pjesë e Njësisë për Sigurinë e Personave dhe Objekteve të Veçanta (JZO), kishin keqtrajtuar studentën Nikolina Sinđelić dhe kolegët e saj në garazhin e ndërtesës së Qeverisë. Ata akuzohen për veprën penale të keqtrajtimit dhe torturës.
Sipas njoftimit të Ministrisë së Punëve të Brendshme, të dyshuarit kanë përdorur forcë dhe kërcënime, u kanë shkaktuar viktimave dhimbje të mëdha dhe vuajtje të rënda, janë përpjekur të nxjerrin prej tyre informacione dhe i kanë frikësuar. Ata dyshohen për veprën penale të keqtrajtimit dhe torturës.
Vëmendje të veçantë tërheq rasti i Milan Vukovićit, i cili pas daljes në pension u emërua drejtor në detyrë i Njësisë së Posaçme të Paraburgimit në Burgun e Qarkut në Beograd. Në të njëjtin institucion ndodhet edhe Kričak, i cili u vendos në paraburgim pas arrestimit.
Më 5 nëntor, televizioni N1 raportoi se policia kishte kontrolluar zyrën e Vukovićit në burg, pas një denoncimi anonim sipas të cilit në ambientet e paraburgimit të Kričakut ishte futur një telefon celular.
