-
Përktheu:
Flutura Gashi-Mehmeti
- 5 nëntor 2026 11:21
- Shpërndaje në:
Kërcënimet për vendosjen e bombave kanë detyruar disa avionë pasagjerësh të kryenin ulje të paplanifikuara në vende të ndryshme të Evropës të enjten në mëngjes, në valën e fundit të kërcënimeve që kanë vënë në shënjestër fluturimet ajrore në kontinent.
Fluturimi EI402 i kompanisë Aer Lingus, nga Dublini drejt Romës, është ulur në mënyrë të sigurt në aeroportin e Evreux, rreth 100 kilometra në perëndim të Parisit, pasi u devijua si masë paraprake sigurie, ka njoftuar kompania irlandeze në një deklaratë.
Mediat belge kanë raportuar se një avion pasagjerësh, i cili është detyruar të ulej në aeroportin Zaventem të Brukselit, i përkiste kompanisë polake LOT.
Ndërkohë, një avion i kompanisë Finnair, i nisur nga Helsinki, është shoqëruar në mënyrë të sigurt nga Forcat Ajrore italiane deri në aeroportin e Romës, ku duhej të ulej sipas itinerarit të planifikuar, ka thënë një burim i afërt me çështjen.
Autoritetet bullgare kanë raportuar se tre avionë kanë kryer ulje emergjente për shkak të kërcënimeve për vendosjen e bombave.
Ministri i Brendshëm i vendit ka bërë të ditur se avionët që udhëtonin nga Kopenhaga dhe Madridi janë ulur në Sofje, ka raportuar televizioni bTV.
Një avion i tretë, i nisur nga Londra, është ulur në Plovdiv, kanë raportuar mediat lokale
Të martën, të paktën shtatë fluturime dhe një anije turistike morën kërcënime për bomba, duke shkaktuar ndërprerje të aktivitetit në aeroportet e Evropës, megjithëse në asnjë rast nuk janë gjetur mjete shpërthyese.
Asnjë shtet nuk e ka fajësuar zyrtarisht ndonjë palë për këto kërcënime, por ato vijnë në një kohë kur zyrtarët evropianë kanë akuzuar Rusinë dhe Iranin për ato që i cilësojnë si “sulme hibride” dhe akte sabotazhi. Moska dhe Teherani i mohojnë këto akuza.
Këtë javë, hakerë të paidentifikuar shkaktuan ndërprerjen e funksionimit të frigoriferëve në supermarkete në disa vende evropiane.
Disa ekspertë vlerësojnë se kërcënimet e rreme për bomba mund të jenë pjesë e një modeli të ngjashëm të përpjekjeve për të shkaktuar kaos dhe ndërprerje të shërbimeve, me kosto të ulët dhe pa lënë gjurmë të qarta të përgjegjësisë.
BE: Shumë herët për të thënë nëse kërcënimet me bomba në aeroplanë janë të lidhura
Photo: Associated Press
Bashkimi Evropian ka reaguar të enjten, pasi një numër i madh fluturimesh nga vende të ndryshme të kontinentit janë detyruar të devijojnë për shkak të kërcënimeve për bombë.
Komisioneri i BE-së për Transportin, Apostolos Tzitzikostas, ka deklaruar se është “ende herët për të nxjerrë përfundime nëse incidentet e raportuara janë të ndërlidhura”, duke theksuar se “çdo kërcënim ndaj civilëve është i papranueshëm”.
“Sigurimi i mbrojtjes dhe sigurisë së qytetarëve mbetet prioritet. Ne po e monitorojmë nga afër situatën dhe jemi në kontakt me shtetet anëtare të prekura dhe Agjencinë Evropiane të Sigurisë së Aviacionit”, ka deklaruar ai.
Tzitzikostas u ka kërkuar autoriteteve kombëtare, të cilat janë përgjegjëse për vlerësimin e kërcënimeve të sigurisë, hetimin e incidenteve dhe zbatimin e masave të duhura për sigurinë e aviacionit, që të bashkëpunojnë ngushtë me operatorët e aeroporteve, kompanitë ajrore dhe autoritetet e zbatimit të ligjit.
Është hera e dytë brenda një jave që incidente të tilla ndodhin në Evropë. Edhe të martën, një numër i madh fluturimesh janë devijuar për shkak të kërcënimeve të ngjashme.