Kryetari i Prishtinës, Përparim Rama, ka reaguar ndaj deputetit të Lëvizjes Vetëvendosje, Ilir Kërceli, për pretendimet e tij rreth shpenzimeve në kontratën e ndriçimit inteligjent të kryeqytetit. Rama e akuzoi deputetin se po e keqinformon opinionin duke e paraqitur koston e një shërbimi të plotë si çmimin e një shiriti.
Sipas Ramës, shuma prej 8.50 eurosh për metër mbulon materialin dhe transportin, angazhimin e punonjësve të kompanisë dhe vendosjen e shiritit në kanalin përkatës nga personeli kompetent. Në këtë çmim, tha ai, përfshihen edhe garancia 10-vjeçare sipas kontratës, mirëmbajtja për 10 vjet sipas nevojës pa pagesë shtesë, si dhe Tatimi mbi Vlerën e Shtuar (TVSH). Paraqitjen e gjithë kësaj kostoje si çmim të shiritit, Rama e cilësoi veprim të ulët.
Të lidhura
None found
Kryetari i Prishtinës tha se procedura është trajtuar nga Organi Shqyrtues i Prokurimit (OSHP), Komisioni Rregullativ i Prokurimit Publik (KRPP), auditorët e brendshëm e të jashtëm dhe hetuesia. Ai vuri në dyshim pretendimin se Kërceli mund ta gjykojë çështjen më mirë se këto institucione dhe i kërkoi deputetit të marrë informacionet bazë e ta lexojë dhe kuptojë kontratën përpara se të flasë publikisht para qytetarëve.
Rama kundërshtoi edhe pohimin se shiriti përdoret për të kufizuar zonën e punimeve. Ai shpjegoi se shiriti vendoset nën tokë për të sinjalizuar praninë e kabllove elektrike, me qëllim që gjatë gërmimeve të ardhshme të shmangen dëmtimet e kabllove dhe rrezikimi i punëtorëve. Paralajmërimi, sipas tij, u shërben ndër të tjera Ujësjellësit, KEDS-it, Termokosit dhe çdo kompanie apo ndërmarrjeje tjetër që mund të kryejë punime nëntokësore.
Duke iu referuar deklaratave të tij për Kryeministrin, Rama tha se pret sulme ndaj vetes, por paralajmëroi se do të ndjekë rrugën ligjore për çdo deklaratë që e konsideron shpifje.
Reagimi erdhi pasi Kërceli ngriti dyshime për kontratën e ndriçimit inteligjent. Deputeti kërkoi sqarime edhe për destinimin e shtyllave të vjetra dhe për mundësinë e nënshkrimit të një aneks-kontrate prej rreth tre milionë eurosh. Ai paralajmëroi gjithashtu se do të analizojë kontratën për sheshin “Gjergj Bush”, ku pretendoi se janë paraparë 18 mijë euro për zhvendosjen dhe rikthimin e bustit të ish-presidentit Ibrahim Rugova.
