Trajneri i Kombëtares shqiptare, Rolando Maran, ka shpallur listën e futbollistëve të grumbulluar për dy ndeshjet e fundit të këtij edicioni të UEFA Nations League.
Risia në këtë listë është mbrojtësi i Dinamos, Ysni Ismaili, i cili merr për herë të parë ftesën për t’u bashkuar me Kombëtaren shqiptare.
Një nga mungesat që bie më shumë në sy është ajo e Ivan Balliut, i cili ka përfunduar rrugëtimin e tij me Kombëtaren pas nëntë vitesh.
Jashtë grumbullimit janë edhe Thomas Strakosha, Armando Broja dhe Nedim Bajrami.
Kuqezinjtë do të përballen fillimisht me Finlandën, më 12 nëntor, në stadiumin “Air Albania”, në orën 20:45, ndërsa tri ditë më vonë do të luajnë në transfertë kundër Bjellorusisë, më 15 nëntor, në orën 18:00, në stadiumin “Illovszky Rudolf” të Budapestit.
Shqipëria kryeson aktualisht Grupin C1 me 9 pikë, ndërsa Bjellorusia dhe Finlanda ndajnë vendin e dytë me nga 7 pikë.
Për këtë arsye, dy takimet e nëntorit janë vendimtare për fatin e kuqezinjve në këtë edicion, me Maranin që synon ta mbyllë fazën e grupeve në mënyrën më të mirë të mundshme.
