Cole Palmer nuk është përfshirë në listën e fundit të Përfaqësueses së Anglisë nga përzgjedhësi Thomas Tuchel, duke shtuar dyshimet për të ardhmen e tij në ekipin kombëtar.
Mesfushori ofensiv i Chelseat, 24-vjeçar, ka regjistruar vetëm tri paraqitje me Anglinë që prej momentit kur Tuchel mori drejtimin e “Tre Luanëve”.
Ndeshjen e fundit me fanellën e Anglisë, Palmer e zhvilloi në mars, kundër Japonisë, ndërsa mungoi në grumbullimin e shtatorit pasi u tërhoq për shkak të një lëndimi.
Më herët, Tuchel kishte shprehur shqetësimet e tij për mungesat e shpeshta të futbollistit, duke deklaruar se Palmeri “humbet shumë mundësi” për t'u paraqitur me Përfaqësuesen dhe duke vënë në pikëpyetje gatishmërinë e tij për angazhimet ndërkombëtare.
Në anën tjetër, 24-vjeçari po kalon një sezon aktiv me Chelsean. Ai ka qenë titullar në të nëntë ndeshjet e skuadrës londineze në Ligën Premier këtë edicion, duke realizuar tri gola dhe duke dhënë tri asistime.
Anglia do të përballet me Kroacinë më 12 nëntor, përpara se tri ditë më vonë të udhëtojë drejt Spanjës për ndeshjen e radhës.
Mungesa e Palmerit në këtë grumbullim i jep atij mundësinë për të pushuar para një periudhe të ngarkuar të sezonit dimëror, por njëkohësisht rikthen në vëmendje raportin e tij me përzgjedhësin Tuchel. /Telegrafi/
