Suksesi 2-1 i Juventusit në transfertën përballë AZ Alkmaarit u shoqërua me tension në çastet përmbyllëse, kur Luciano Spalletti reagoi ashpër ndaj Juan Cabalit. Një gabim në vendosjen e mbrojtësit kolumbian bëri që trajneri të humbiste durimin dhe ta kërcënonte se do ta godiste me grusht.
Në përballjen e së enjtes në Ligën e Evropës, golat e Teun Koopmeiners dhe Randal Kolo Muanit i siguruan fitoren Juventusit. Megjithatë, mënyra se si skuadra i luajti minutat e fundit shkaktoi pakënaqësi të dukshme te Spalletti.
Të lidhura
None found
Mediat italiane raportojnë se nervozizmi i teknikut ishte vënë re edhe gjatë pjesës së mëparshme të takimit, si pasojë e pasaktësive dhe përqendrimit të pamjaftueshëm të futbollistëve të tij.
Gabimet e njëpasnjëshme të repartit mbrojtës e shtuan tensionin. Lloyd Kelly ishte i pari që humbi zotërimin e topit në një zonë delikate, duke i dhënë Meerdinkut mundësinë të shënonte dhe ta çonte rezultatin në 2-1.
Më pas, largimi i Juan Cabalit nga pozicioni i duhur i hapi rrugë një tjetër sulmi të rrezikshëm të kundërshtarit. AZ Alkmaar e dërgoi përsëri topin në rrjetë, por këtë herë goli nuk u quajt për pozicion jashtë loje.
Pikërisht pas këtij episodi, kamerat televizive regjistruan Spallettin teksa thërriste Cabalin pranë vijës anësore për t’i dhënë një paralajmërim të pazakontë. Trajneri dëgjohet duke i thënë lojtarit se, nëse nuk tregonte kujdes, herën tjetër do ta godiste me grusht.
Në raportimin e mediumit italian Fanpage thuhet se tekniku ia çoi edhe grushtin e mbledhur afër fytyrës. I habitur nga ky reagim, Cabal tentoi t’i shpjegonte përse kishte vepruar në atë mënyrë.
Kolumbiani kishte hyrë në fushë në minutën e 60-të, duke zëvendësuar Andrea Cambiason. Për lojën e zhvilluar, La Gazzetta dello Sport i dha notën 5.5.
Në deklaratat pas përballjes me AZ Alkmaarin, Spalletti pranoi se Juventusi ia kishte ndërlikuar vetes një ndeshje që duhej ta administronte më mirë.
Sipas tij, nëse takimi do të vazhdonte edhe pesë minuta, skuadra me shumë gjasë nuk do ta mbante dot avantazhin. Ai shtoi gjithashtu se Juventusi duhej të kishte realizuar golin e tretë.
Për Cabalin, ky nuk ishte ballafaqimi i parë me një reagim të fortë të trajnerit. Në një takim të mëparshëm ndaj Napolit, pas shënimit të Kenan Yildizit, Spalletti e kishte afruar pranë vetes, e kishte zënë nga fytyra dhe i kishte bërtitur që të mos dorëzohej.
Ndërkaq, në përballjen e shkurtit kundër Galatasarayt, mbrojtësi mori dy kartonë të verdhë në harkun e vetëm tetë minutave.
Pas atij episodi, Spalletti ishte shprehur se Cabal është një lojtar i ndjeshëm dhe se, në raste të caktuara, has vështirësi për ta mbajtur veten nën kontroll.
Edhe vetë trajneri italian ka pasur përgjatë karrierës disa përplasje me lojtarë e kolegë, ndaj reagimet e tij impulsive nuk përbëjnë risi.
Periudha e tij te Roma u shënua nga një konflikt i hapur me legjendën Francesco Totti. Më vonë, gjatë drejtimit të Interit, ai mori vendimin për t’ia hequr Mauro Icardit shiritin e kapitenit.
Vetëm disa javë më parë, pas mbylljes së një ndeshjeje, Spalletti pati një debat të fortë me Fabio Pisacanen, trajnerin e Cagliarit. Për atë përplasje, të dy morën kartonë të kuq.
Megjithatë, në marrëdhëniet me futbollistët, tekniku italian shfaq edhe anën e tij më të afërt. Në një prej stërvitjeve të kësaj jave, ai i dha talentit Kerim Alajbegoviq një goditje të lehtë, miqësore, në faqe.
