Kane shpërthyer akuzat e renda mes personazheve që kanë qenë në protestat në Shqipëri që nga dita e parë. Gent Progni në një status publik akuzoi aktivistin Andi Tepelena si “palaço” dhe të shitur te Sorosi, ndërsa vetë Tepelena nuk është kursyer.
Progni thoshte se Tepelena ka qenë në takim me Presidentin Begaj dhe Oligert Torbën, kjo për të përçarë protestuesit. “Zbulohet një tjetër gili vils i pushtetit. Andi Tepelena, në takim me president Baromin dhe me Oligert Torbën. Nuk di të ketë vendosur protesta përfaqësues për të takuar kriminel Torbën dhe gjumash Baromin, vetëm nëse e ka vendosur Sorosi pa dijeninë tonë.
Të njëjtët njerëz që për çdo vendim që duhet të merrnim për avancimin dhe përshkallëzim votonin kundër në grupin e “koordinuesve”. Ky që edhe veza kur e postova në poster i dukej akt i dhunshëm. Të shiturit dhe të paaftët që na vonuan, nuk do na ndalojnë dot me skemat alla Soros, të arrijmë të shpëtojmë Shqipërinë”, shkruan Progni duke postuar një lajm ku Andi Tepelena përgënjeshtron idenë e kthimit të protestës në një parti politike.
Ndërkohë, vetë Tepelena thotë se ka qenë pjesë e protestës që ditën e parë dhe kurrë nuk ka bërë pazare. Ai shkruan se “përbuz me neveri çdo status përçarës dhe helm që sjell veç të këqia që investojnë tek kjo përçarje”.
Në një përgjigje direkte për Gent Prognin, por pa ia përmendur emrin këtij të fundit, Tepelena thotë se “nuk fshihem mbrapa azileve politike, as mbrapa ekraneve të kompjuterave me mijëra kilometra larg nga sheshi betejës për të hedhur vrer dhe përçarë gjënë më të bukur që i ka ndodhur Shqipërisë.”
“Miq, që ditën e parë kam qënë pjesë me shpirt, kurajo e zemër e Protestës Historike që ende vazhdon.
Kurrë, e përsëris kurrë, nuk kam bërë pazare as nuk më ka shkuar ndërmend të shes luftën time dhe të miqve të mi. Ndryshe do isha në krahun tjetër të luftës.
Përbuz çdo ligësi, status përçarës dhe helm që sjell veç të këqia që investojnë tek kjo përçarje. Por kjo nuk duhet të ndodhë.
Mendoj që protesta është e shqiptarve as e Andit, dhe e askujt.
Po, unë dhe miq të tjerë kemi votuar që mikrofoni mos kthehej as në parti politike as në përfitues fondesh sidomos në momentet që sytë dhe veshët e gjithë shqiptarisë ishin nga idealizmi jonë, ne ishim dhe jemi pjesë e të tërës, dhe nuk do ndahemi nga protesta.
Unë jam çdo ditë në shesh. Nuk fshihem mbrapa azileve politike, as mbrapa ekraneve të kompjuterave me mijëra kilometra larg nga sheshi betejës për të hedhur vrer dhe përçarë gjënë më të bukur që i ka ndodhur Shqipërisë… PROTESTËN
Kaq.
JO PËRÇARJE. PO BASHKIM, PO FITORE.
RROFTË SHQIPËRIA”, e mbyll ai statusin.
