Qeveria kineze po mban kontakte me Real Madridin, La Ligën dhe institucione të tjera të Spanjës pas debatit të nxitur nga komentet e Kylian Mbappes. Këtë e konfirmoi ambasadori i Kinës në Spanjë, Yao Jing.
Në një prononcim për agjencinë e lajmeve EFE të premten, diplomati bëri dallimin mes këtyre kontakteve dhe negociatave zyrtare. Sipas tij, palët po komunikojnë për të arritur mirëkuptim të ndërsjellë, pa zhvilluar negociata.
Të lidhura
None found
Në qendër të polemikave ishte një imazh që Mbappe e kishte renditur mes memeve të tij të preferuara. Në të, fytyra e futbollistit ishte montuar mbi atë të një diktatori kinez.
Fotografia paraqiste Mao Ce Dunin, ish-udhëheqësin historik të Kinës, megjithëse sulmuesi francez nuk ia kishte përmendur emrin drejtpërdrejt.
Reagimet e shumta ndaj episodit u pasuan nga kërkesa për falje si nga Mbappe, ashtu edhe nga Real Madridi. Pavarësisht kësaj, televizioni shtetëror kinez CCTV ende nuk i ka rifilluar transmetimet e ndeshjeve të La Ligës.
Yao Jing nënvizoi se tejkalimi i këtij incidenti kërkon më shumë kohë për Kinën. Me këtë qëndrim, ambasadori la të kuptohej se ndeshjet e kampionatit spanjoll nuk pritet të rikthehen menjëherë në transmetim.
