Prokuroria e Posaçme, SPAK njoftoi të premten përfundimin e hetimit pasuror ndaj Nikolin Gjolenës dhe Klevent Gjolenës, të dënuar si anëtarë të një grupi të trafikut ndërkombëtar të drogës, si dhe ndaj gjashtë personave të lidhur me ta, hetimi është kryer bazuar në ligjin “Për parandalimin dhe goditjen e krimit të organizuar, trafikimit, korrupsionit dhe krimeve të tjera nëpërmjet masave parandaluese kundër pasurisë”, i ndryshuar, i njohur ndryshe dhe si ligji antimafia.
Nga hetimi pasuror ka rezultuar në emër të të dënuarve Nikolin Gjolena dhe Klevent Gjolena, familjarëve të tyre, si dhe personave të lidhur me ta, janë identifikuar ndër të tjera dhe 16 pasuri të paluajtshme në Tiranë dhe Durrës, që sipas SPAK kanë një vlerë tregu prej rreth 2 milionë eurosh. Konkretisht, SPAK kërkon konfiskimin e tre apartamenteve me sipërfaqe totale 214 m2 dhe dy garazheve me sipqërfaqe të përbashkët 80.6 m2 në Tiranë; tre njësi me sipërfaqe 325 m2 në vendin e quajtur “Plazhi” në Durrës; si dhe tetë apartamente me sipërfaqe totale 596.6 m2 në të njëjtën zonë.
Sipas prokurorisë, për financimin e disa prej pasurive për të cilat kërkohet konfiskimi, janë janë kryer pesë transferta monetare në shuma të konsiderueshme, në vlerën prej 42 mijë e 942 USD dhe 404 mijë euro. Transfertat janë kryer në emër të familjarëve të personave nën hetim dhe kanë ardhur nga vende të ndryshme të Amerikës Qendrore dhe të rajonit të Karaibeve, të njohura si parajsa fiskale.
SPAK arrin në përfundimin se shtetasit Nikolin e Klevent Gjolena, si dhe personat e lidhur me ta, nuk kanë arritur që të vërtetojnë ligjshmërinë e të ardhurave që janë përdorur si burim për krijimin e këtyre pasurive të paluajtshme.
Nga verifikimi kontratave fillestare të këtyre pasurive, ka rezultuar se janë blerë për afro 1 milion euro, ndërsa vlera aktuale sipas çmimit të tregut, arrin në shumën prej mbi 2 milionë euro.
PSAK bënë me dije se po vijon hetimet për identifikimin, sekuestrimin dhe konfiskimin e pasurive të tjera të zotëruara nga subjekte të tjerë të proceduar në kuadër të këtyre hetimeve, si dhe të personave të lidhur me ta.
Nikolin e Klevent Gjolena u akuzuan dhe u dënuan si pjesë e një grupi të strukturuar kriminal që mundësoi trafikimin nga Kolumbia në Shqipëri të një sasie prej 485.5 kg kokainë, që ishte fshehur në një ngarkesë me pleh organik artificial. Lënda narkotike u sekuestrua më 24 nëntor të vitit 2022 në fshatin Frakull e Madhe të Bashkisë Fier. Të 11 të pandehurit në këtë çështje, mes tyre dhe ish-kryetari socialist i ish-komunës Frakull në Fier, Viktor Çervanaku u deklaruan fajtorë në të dy shkallët e Gjykatës së Posaçme dhe u dënuan në total me 88 vjet e 4 muaj burgim.
