Në Mesdheun Lindor, Qiproja po riorienton partneritetet e saj, duke forcuar bashkëpunimin strategjik me Shtetet e Bashkuara dhe duke zvogëluar hap pas hapi varësinë ushtarake dhe lidhjet e kahershme me Rusinë.
Për një periudhë disadekadëshe, Republika e Qipros u përpoq të mbante një qëndrim të balancuar ndërmjet Lindjes dhe Perëndimit. Në këtë kuadër, ajo ruajti raporte të afërta me Moskën, sidomos në ekonomi dhe në sektorin ushtarak.
Të lidhura
None found
Në formësimin e kësaj politike ndikuan edhe tensionet me Uashingtonin, të lidhura me pushtimin turk të ishullit në vitin 1974 dhe me embargon e armëve që Shtetet e Bashkuara vendosën në vitin 1987.
Pushtimi i Ukrainës nga Rusia në shkurt 2022 solli një ndryshim të rëndësishëm në këtë qasje. Duke mbështetur sanksionet e Bashkimit Europian ndaj Moskës, Qiproja nisi të largohej nga ekuilibri që kishte ruajtur tradicionalisht mes Rusisë dhe Perëndimit. Në të njëjtën kohë, siç kujton DW, bashkëpunimi me SHBA-në mori hov, kryesisht në çështjet e sigurisë dhe të mbrojtjes.
Hapat konkretë të këtij afrimi përfshinë shfuqizimin e embargos amerikane të armëve në vitin 2022 dhe ngritjen e qendrës së trajnimit CYCLOPS në Larnaka. Më pas, në vitin 2025, Qiproja u përfshi edhe në programet e Shteteve të Bashkuara për prokurimin e pajisjeve ushtarake.
Për Nikozinë, këto ndryshime kanë hapur më shumë mundësi për modernizimin e forcave të armatosura. Përpjekjet tashmë synojnë uljen graduale të mbështetjes tek armatimet ruse, mes të cilave tanket T-80 dhe sistemet e mbrojtjes ajrore Tor-M1 dhe Buk.
Procesi duket se ka marrë ritëm edhe për shkak të pengesave në furnizimin me municione dhe pjesë këmbimi, të shkaktuara nga sanksionet kundër Rusisë.
Ndërkohë, John Bresloë, ambasadori amerikan në Qipro, ka njoftuar plane që parashikojnë modernizimin e bazës ajrore Andreas Papandreou në Pafos. Ato përfshijnë gjithashtu më shumë vizita të anijeve luftarake amerikane në portet e Qipros dhe zgjerimin e stërvitjeve të përbashkëta ushtarake.
