Kina në kontakt me Real Madridin dhe La Ligën për komentet e Mbappes për Mao Ce Dunin

Kina është në kontakt me Real Madridin dhe La Ligën lidhur me pasojat e komenteve të Kylian Mbappe-s në lidhje me Mao Ce Dunin, tha të premten ambasadori i Kinës në Spanjë, Yao Jing.

“Nuk ka negociata, por ka komunikim, bazuar në mirëkuptim të ndërsjellë”, tha Yao për agjencinë spanjolle të lajmeve EFE përpara se të merrte pjesë në një forum në Universitetin e Salamankës.

 “Ky incident i pafat lëndoi ndjenjat e shumë njerëzve në Kinë, të cilët tani duhet të përballen me situatën aktuale”, shtoi ai.

Debati filloi pasi një video qarkulloi në internet, në të cilën sulmuesi i Real Madridit dhe Francës diskutonte një meme që tregonte fytyrën e tij të mbivendosur mbi një imazh të Maos.

Mbappe e përshkroi figurën si “një djalë, mendoj se është një diktator kinez”, por nuk e përmendi Maon, udhëheqësin themelues të Kinës moderne i cili qeverisi vendin nga viti 1949 deri në vdekjen e tij në vitin 1976.

LaLiga, Real Madridi dhe futbollisti francez kërkuan falje më pas. Transmetuesi shtetëror i Kinës CCTV pezulloi mbulimin e La Ligas dhe disa marka kineze e hoqën Mbappen nga fushatat e tyre të marketingut.

Platforma e transmetimit Migu nuk e transmetoi ndeshjen e Real Madridit kundër Racing Santander fundjavën e kaluar, ndërsa transmetoi ndeshje të tjera të ligës spanjolle.

Grupi Mediatik i Kinës tha javën e kaluar se do të dëgjonte atë që Mbappe kishte për të thënë pas kërkimfaljes së tij dhe, “më e rëndësishmja”, do të shikonte se çfarë do të bënte ai.

Presidenti i LaLigas, Javier Tebas, u takua me Yaon javën e kaluar, ndërsa futbolli spanjoll kërkoi të kufizonte pasojat komerciale dhe tha të hënën se liga po vazhdonte dialogun me autoritetet kineze.

LaLiga po “punonte për ta zgjidhur atë”, tha Tebas në forumin World In Progress, duke shtuar se vazhdonte të kishte një “marrëdhënie të jashtëzakonshme” me CCTV dhe Migu.

LaLiga dhe Migu kanë një marrëveshje që lejon transmetimin e ndeshjeve të divizionit më të lartë të Spanjës deri në fund të sezonit 2029-2030.

Presidenti i LaLiga-s tha se kontratat e transmetimit të ligës me CCTV dhe Migu arritën në total rreth 10 milionë euro (11.20 milionë dollarë) në vit, duke rënë nga 100 milionë euro në vit në kulmin e tyre.