Jason Reding Quiñones, prokurori federal që drejtoi në Miami hetimet mbi çështjet penale të mëparshme ndaj presidentit amerikan Donald Trump, ka dhënë dorëheqjen nga detyra.
Lajmi u bë i ditur të premten nga Prokurori i Përgjithshëm i SHBA-së, Todd Blanche, sipas Reuters.
Quiñones drejtonte zyrën e prokurorit federal për Distriktin Jugor të Floridës, e cila ishte ngarkuar me shqyrtimin e hetimeve të mëparshme ndaj Trumpit, përfshirë çështjen e dokumenteve të klasifikuara që ai kishte marrë me vete pas largimit nga Shtëpia e Bardhë në vitin 2021, si dhe hetimet mbi kontaktet e fushatës së tij me Rusinë gjatë zgjedhjeve presidenciale të vitit 2016.
Këto hetime ishin pjesë e përpjekjeve të administratës Trump për të rihapur çështjet e mëparshme penale ndaj presidentit dhe për të shqyrtuar veprimet e institucioneve që kishin drejtuar hetimet ndaj tij. Deri më tani, këto përpjekje nuk kanë prodhuar rezultate konkrete.
Dorëheqja e Quiñones shënon largimin e zyrtarit të dytë të nivelit të lartë nga Departamenti i Drejtësisë që prej zgjedhjeve të mesmandatit të së martës, në të cilat republikanët e Trumpit humbën kontrollin e Kongresit.
Një ditë më parë kishte dhënë dorëheqjen edhe Harmeet Dhillon, e cila drejtonte njësinë për të drejtat civile në Departamentin e Drejtësisë.
Arsyet e largimit të Quiñones nuk janë bërë ende të qarta. Në një reagim në rrjetin social X, ai konfirmoi se dorëheqja hynte në fuqi të premten, duke e cilësuar një nder shërbimin në këtë detyrë.
Gjatë drejtimit të tij, zyra e prokurorit federal në Florida ishte përfshirë edhe në ngritjen e akuzave penale ndaj ish-presidentit kubanez Raúl Castro, në një përshkallëzim të fushatës së presionit të administratës Trump ndaj Kubës.
