Presidenti i Polonisë, Karol Nawrocki, ka kërkuar krijimin e një garde presidenciale të posaçme, e cila do të zëvendësonte strukturën aktuale të sigurisë së kreut të shtetit. Sipas propozimit, shërbimi i ri do të ishte jashtë kontrollit të qeverisë dhe do t’i raportonte drejtpërdrejt presidentit.
Lajmi u konfirmua për televizionin Republika nga kreu i Zyrës së Presidentit, Zbigniew Bogucki. Kërkesa ka nxitur reagime dhe kritika, ndërsa vjen në një kohë tensionesh të forta mes presidencës dhe qeverisë polake për kompetencat institucionale dhe funksionimin e Gjykatës Kushtetuese.
LEXO EDHE: Opozita në Poloni kërkon rrëzimin e qeverisë së Donald Tusk, propozohet një administratë teknike
Ministri i Jashtëm i Polonisë, Radosław Sikorski, komentoi përplasjet mes palëve, duke deklaruar se Nawrocki “duket se mendon se është Mbreti Diell”. Në një intervistë për televizionin publik TVP.info, ai akuzoi presidentin se po përpiqet të zgjerojë kompetencat e tij përmes interpretimeve të detyrimeve kushtetuese dhe protokollare.
“Ai po përpiqet t’i interpretojë detyrimet e tij protokollare, siç është betimi para tij, emërimi i ambasadorëve ose gjeneralëve, në një mënyrë të tillë që të zgjerojë pushtetin e tij, se ai vendos se kush do të jetë gjyqtar dhe kush jo. Ne nuk do të pajtohemi me një sistem presidencial sepse Kushtetuta nuk e parashikon këtë dhe kjo nuk është arsyeja pse populli e zgjodhi presidentin”, deklaroi Sikorski.
LEXO EDHE: Presidenti polak Nawrocki hyn me forcë në Gjykatën e Lartë mes përplasjes për shtetin e së drejtës
