Nga janari i vitit 2027, drejtuesit e automjeteve në Shqipëri nuk do ta paguajnë më taksën e qarkullimit përmes çdo litri karburant që blejnë, por përmes taksave që lidhen drejtpërdrejt me automjetin.
Taksa, e cila aplikohet në çmimin e karburanteve që prej vitit 2011, aktualisht është 27 lekë për litër, ose 32.4 lekë për litër bashkë me TVSH-në. Me skemën e re, detyrimi do të zhvendoset te taksat e automjeteve dhe do të llogaritet sipas tre elementeve: vjetërsisë së makinës, fuqisë motorike dhe llojit të karburantit që përdor.
Por zhvendosja e taksës nuk garanton automatikisht që çmimi i naftës dhe benzinës në tabela do të ulet në mënyrë të qëndrueshme. Për këtë arsye, ministrja Ibrahimaj bëri të ditur se po shqyrtohet ngritja e një mekanizmi të përhershëm transparence, që do të monitorojë reflektimin e heqjes së taksës në çmimin përfundimtar të karburanteve.
“Jemi duke menduar një mekanizëm transparence i cili do të jetë permanent, me qëllim që të garantojmë që ai reduktim i taksës nuk do të jetë vetëm i reflektuar në çmimet e tabelave në momentin e parë, por do të jetë në mënyrë permanente reflektuar në çmimet e tabelave”, deklaroi Ibrahimaj.
Ministrja pranoi gjithashtu se ndryshimi i skemës do të krijojë një diferencë në të ardhurat e arkëtuara nga shteti. Sipas saj, kalimi i mbledhjes së taksës nga karburantet te automjetet do të shoqërohet me një deficit prej rreth 5 miliardë lekësh, ose afro 60 milionë eurosh.
Ajo vuri në dukje se mbledhja e taksës nëpërmjet pompave të karburantit është më efektive sesa arkëtimi i saj përmes taksave të automjeteve.
Megjithatë, sipas Ibrahimajt, qeveria ka vendosur të ndërmarrë këtë ndryshim për shkak të çmimeve të larta të karburanteve dhe ndikimit të krizës në Lindjen e Mesme.
“Jemi duke menduar një mekanizëm transparence i cili do të jetë permanent me qëllim që të garantojmë që ai reduktim i taksës nuk do të jetë vetëm i reflektuar në çmimet e tabelave në momentin e parë pasi ajo është e paevitueshme, por do të jetë në mënyrë permanente reflektuar në çmimet e tabelave.
Ne kemi një transferim, po të themi, të një pjese të të ardhurave që do të mblidheshin nga karburantet në makina. Megjithatë dhe aty ka një deficit prej 5 miliard lekësh rreth gati 60 milionë euro. Sigurisht që efektiviteti i mbledhjes së taksës në pompë është shumë më i lartë sesa efektiviteti i mbledhjes së taksës në makina. Megjithatë është një nisëm të cilën neve vendosëm që ka ardhur momenti ta ndërmarrim pasi çmimet e karburanteve për hir së vërtetës janë të larta dhe të ndikuara nga kriza në Lindjen e Mesme”, tha mes të tjerash Ibrahimaj.
Kështu, ndryshimi i parashikuar synon të zhvendosë mënyrën e mbledhjes së taksës nga karburanti te automjetet, ndërsa mbetet për t’u parë se si do të funksionojë mekanizmi i transparencës për të siguruar që ulja e taksës të reflektohet në mënyrë të qëndrueshme në çmimet në pompa.”
