Presidentja e Kosovës, Justina Shiroka Pula, është takuar sot me kryetarët e komunave, me të cilët ka diskutuar për punën, arritjet dhe sfidat me të cilat përballen komunat në vend.
Gjatë takimit, kryetarët e komunave e uruan Shiroka Pulën për marrjen e detyrës së Presidentes dhe shprehën mbështetjen e tyre për të.
Sipas njoftimit të Presidencës, Shiroka Pula ka theksuar rëndësinë e pushtetit lokal, duke e cilësuar atë si nivelin e qeverisjes më të afërt me qytetarët.
Ajo ka thënë se komunat janë dera e parë ku qytetarët kërkojnë zgjidhje për problemet e tyre dhe se pikërisht në këtë nivel ata e shohin çdo ditë funksionimin e institucioneve dhe përgjegjësinë që tregojnë ato.
Presidentja ka vlerësuar gjithashtu se komunat përbëjnë një urë lidhëse ndërmjet qytetarëve dhe institucioneve të nivelit qendror.
Shiroka Pula i ka siguruar kryetarët e komunave se do ta kenë mbështetjen e saj brenda kompetencave kushtetuese dhe institucionale.
Ajo është zotuar se në takimet me përfaqësues të shteteve të tjera, institucione ndërkombëtare dhe partnerë zhvillimorë, do ta prezantojë potencialin e komunave të Kosovës.
Po ashtu, ka bërë të ditur se do të angazhohet për tërheqjen e investimeve të huaja dhe krijimin e mundësive të reja për financimin e projekteve komunale nga donatorët ndërkombëtarë.