Qytetarë dhe turistë fotografohen te “Sofra e Dialogut”, Rama: Destinacioni më i ri turistik i Tiranës
Kryeministri Edi Rama ka ndarë në rrjetet sociale disa fotografi të qytetarëve shqiptarë dhe turistëve që kanë ndaluar për të bërë foto pranë instalacionit të njohur si “Sofra e Dialogut”, të vendosur prej më shumë se dy javësh përpara godinës së Kryeministrisë.
Në tryezën prej betoni, e cila është kthyer në një pikë tërheqëse për kalimtarët, janë vendosur letra me mbishkrimin “Dialog”, si simbol i gatishmërisë së qeverisë për të zhvilluar bisedime me studentët protestues.
Përmes postimit të tij, Rama e ka cilësuar këtë hapësirë si një destinacion të ri turistik për kryeqytetin. “Mirëmëngjes 😍 dhe me destinacionin më të ri turistik të Tiranës, ju uroj fundjavë të buzëqeshur”, shkruan kryeministri.
Kreu i qeverisë ka shprehur vazhdimisht gatishmërinë për të shqyrtuar propozimet e studentëve dhe për të adresuar shqetësimet e tyre, por deri më tani kjo ofertë është refuzuar nga protestuesit.
/vizionplus.tv
