Policia ka zbardhur shpërthimin me tritol të një automjeti në pronësi të një qytetareje në lagjen “28 Nëntori” në Elbasan, ngjarje e ndodhur më 5 nëntor, rreth orës 02:00.
Në kuadër të operacionit të koduar “Porosia”, është arrestuar 43-vjeçari E. T., banues në Durrës, i dyshuar se ka siguruar automjetin e përdorur për realizimin e shpërthimit.
Ndërkohë, tre persona të tjerë janë shpallur në kërkim: O. E., 36 vjeç, dhe M. A., 33 vjeç, banues në Elbasan, si dhe një 17-vjeçar nga Durrësi.
Nga hetimet, deklarimet e marra dhe këqyrja e pamjeve filmike, dyshohet se katër personat kanë bashkëpunuar për organizimin dhe vendosjen e lëndës plasëse në automjetin e shtetases A. D.
Operacioni u zhvillua nga specialistët për Hetimin e Krimeve të Komisariatit të Policisë Elbasan, në bashkëpunim me strukturat e DVP Durrës.
Policia dhe Prokuroria vijojnë hetimet për kapjen e tre personave të shpallur në kërkim dhe identifikimin e personave të tjerë që mund të kenë qenë të përfshirë në ngjarje.
Materialet procedurale i janë referuar Prokurorisë së Elbasanit për veprat penale “Shkatërrimi i pronës me eksploziv”, kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe i municionit”.