Irani ekzekuton një burrë të akuzuar për sulm të armatosur ndaj një stacioni policor

Irani ka ekzekutuar një burrë nga komuniteti baluç, i cili akuzohej për përfshirje në një sulm të armatosur ndaj një stacioni policor në juglindje të vendit, ku disa efektivë policie u vranë dhe u plagosën, raportuan mediat iraniane të shtunën.

Mohammad Aref Shahbakhsh, i identifikuar nga mediat si anëtar i grupit militant sunit Jaish al-Adl, ishte dënuar për rebelim të armatosur dhe për veprën penale të njohur si “luftë kundër Zotit”, në lidhje me sulmin ndaj stacionit policor Qaleh Bid në Khash, në provincën Sistan-Baluçestan.

Raporti nuk specifikonte se kur kishte ndodhur sulmi dhe as numrin e efektivëve të policisë që ishin vrarë dhe plagosur.

Jaish al-Adl, i cili vepron në juglindje të Iranit, pranë kufirit me Pakistanin, ka ndërmarrë një sërë sulmesh kundër forcave iraniane të sigurisë.