Ivan Balliu është tërhequr nga Kombëtarja shqiptare, një vendim që është bërë publik nga trajneri i kuqezinjve, Rolando Maran. Megjithatë, mënyra se si është komunikuar largimi i mbrojtësit ka ngritur pikëpyetje, pasi vetë futbollisti nuk ka bërë ende asnjë deklaratë zyrtare për këtë çështje.
Në konferencën për shtyp, Maran konfirmoi se Balliu ka vendosur të mos jetë më pjesë e përfaqësueses shqiptare, duke përmendur problemet fizike dhe vështirësitë që lojtari po kalon në klubin e tij.
“Sa i përket Balliut, ka qenë zgjedhja e tij për të hequr dorë nga Kombëtarja. Ka një dëmtim që e shqetëson dhe ka vështirësi me klubin, ndaj ka vendosur të heqë dorë nga kjo aventurë”, deklaroi trajneri.
Ajo që ka tërhequr vëmendjen është fakti se vetë mbrojtësi nuk ka reaguar publikisht për vendimin. Përkundrazi, një ditë më parë ai kishte publikuar në rrjetet sociale një postim ku shfaqej duke u stërvitur me skuadrën e tij, Rajo Vajekano.
Ky detaj ka shtuar pikëpyetjet rreth largimit të tij dhe rrethanave që kanë çuar në këtë vendim, ndërsa deri tani nuk ka një sqarim të drejtpërdrejtë nga futbollisti.
Balliu, 34 vjeç, ka zhvilluar 24 ndeshje me fanellën e Shqipërisë dhe ishte gjithashtu pjesë e skuadrës kuqezi në Kampionatin Evropian të vitit 2024 në Gjermani.
Largimi i tij vjen në një moment kur Shqipëria ka nevojë për alternativa në krahun e djathtë të mbrojtjes.