Prokuroria e Elbasanit ka sekuestruar mbi 300 tonë pluhur të prodhuar nga Uzina e Ferrokromit, në pronësi të kompanisë koncesionare Albchrome. Mbetjet, të cilat dyshohet se përbëjnë rrezik për mjedisin dhe shëndetin, janë marrë në cilësinë e provës materiale në kuadër të një hetimi penal për mënyrën e depozitimit të tyre.
Bëhet fjalë për pluhurin e mbledhur nga sistemi i filtrimit të uzinës, i cili, sipas një raporti të Agjencisë Kombëtare të Mjedisit (AKM), është cilësuar si shumë i rrezikshëm.
Në dokumentet zyrtare të Prokurorisë së Elbasanit thuhet se sekuestrimi është kryer pasi kjo sasi mbetjesh konsiderohet e domosdoshme për vërtetimin e fakteve që janë objekt i hetimit penal.
Për shkak të natyrës së materialit, prokurorët kanë vendosur që mbetjet të qëndrojnë në ruajtje pranë vetë kompanisë Albchrome sh.p.k., e cila ka detyrimin t’i ruajë dhe t’ia paraqesë organit procedues sa herë që i kërkohet.
Çështja u bë publike më 28 maj, kur Inspektorati Kombëtar i Mbrojtjes së Territorit pezulloi aktivitetin e Albchrome, pasi konstatoi depozitimin e 318 tonëve mbetje të rrezikshme në kushte që nuk garantonin sigurinë.
Gjatë kontrolleve u evidentua se kompania nuk dispononte asnjë kontratë për transferimin e mbetjeve drejt subjekteve të autorizuara për evadimin, asgjësimin apo përpunimin e tyre.
Pak ditë më parë, edhe Agjencia Kombëtare e Mjedisit i cilësoi këto mbetje si shumë të rrezikshme, duke shtuar shqetësimet për mënyrën se si ishin administruar nga kompania.